„აფბამ“ და „ბილაინმა“ პროექტ „განავითარე ბიზნესის“ შედეგების დასკვნითი კონფერენცია გამართეს

2016-07-15 23:23:35, 1205 ნახვა

ეკონომიკა

„ახალგაზრდა ფინანსისტთა და ბიზნესმენთა ასოციაცია - აფბამ“ და კომპანია „ბილაინმა“, სასტუმრო „ჰოლიდეი ინ“-ში, ერთობლივი პროექტის - „განავითარე ბიზნესის“ შედეგების დასკვნითი კონფერენცია გამართეს.

პროექტი „განავითარე ბიზნესი“ განხორციელდა კომპანია „ვიმპელკომის“ მხარდაჭერით, რომელიც საქართველოში „ბილაინის“ ბრენდით ოპერირებს. მცირე მეწარმეობის მხარდამჭერ პროექტებში, „ვიმპელკომი“ სოციალური პასუხისმგებლობის კამპანიის, - Make your Mark, ფარგლებში მონაწილეობს. ამ კამპანიას „ვიმპელკომი ყველა იმ ქვეყანაში ახორციელებს, სადაც ის ოპერირებს.

პროექტის სამიზნე აუდიტორიას თვითდასაქმებულები წარმოადგენდნენ, სეგმენტი, რომელიც საქართველოში დასაქმებულთა საერთო რაოდენობის 60%-ზე მეტია. ხოლო მიზანი, სახელმწიფოს მიერ ინიცირებული შესაბამისი პროექტებისადმი მხარდაჭერა, სახელმწიფო ინიციატივების იმპლემენტაციის გაუმჯობესება და ამ ინიციატივების ბენეფიციარებამდე მიტანაში დახმარება იყო.

პროექტის ფარგლებში „აფბამ“ მოაწყო 21 შეხვედრა პრეზენტაცია რეგიონებში პოტენციურ ბენეფიციარებთან. გაიმართა სამუშაო შეხვედრები სახელმწიფო სტრუქტურების წარმომადგენლებთან და ჩატარდა 9 ღია შეხვედრა-დისკუსია დარგის ექპერტებსა და ანალიტიკოსებთან.

„აფბამ“ კვლევის პროცესში გამოვლენილი პრობლემების გადასაჭრელად შესაბამისი რეკომენდაციებიც შეიმუშავა, რომელიც სარეკომენდაციო ხასიათით, მთავრობის შესაბამის უწყებებს მიეწოდება.

(R)