ქართველი მუსლიმები საფრანგეთში, ჟურნალ Charlie Hebdo-ს რედაქციაზე მომხდარი ტერორისტული აქტის გამო,  რა დროსაც  12 ადამიანი დაიღუპა და ათამდე დაშავდა, შეძრწუნებულები არიან.

როგორც „ქართველ მუსლიმთა კავშირის“ თავმჯდომარე ტარიელ ნაკაიძე მის მიერ გავრცელებულ განცხადებაში აღნიშნავს,  ეს ფაქტი სრულიად მუსლიმი თემისაკენ მიმართული ტერორისტული აქტია.

„ქართველი მუსლიმები შეძრწუნებული ვართ მიმდინარე წლის 7 იანვარს საფრანგეთის დედაქალაქში - პარიზში მედიაზე განხორციელებული ბარბაროსული აქტის გამო, რომლის შედეგადაც დაიღუპა 12 და დაშავდა ათზე მეტი ადამიანი. ვწუხვართ მომხდარის გამო და გულწრფელ თანაგრძნობას ვუცხადებთ გარდაცვლილთა ოჯახის წევრებს, სრულიად საფრანგეთის მოსახლეობას. ჯერ სრულად დაუზუსტებელი, მაგრამ დიდი ეჭვი იმის შესახებ, რომ ეს საზარელი აქტი განხორციელდა ისლამის სახელით, ეგრეთწოდებული მუსლიმების მიერ, ჩვენ, ქართველ მუსლიმებს, გულის სიღრმემდე გვზარავს. ჩვენთვის, როგორც ჭეშმარიტი ისლამის მიმდევართათვის, სრულიად მიუღებელია კაცთაკვლა, შურისძიება, სისხლი, ცრემლი და უბედურება, ვინც არ უნდა სჩადიოდეს მას. საჯაროდაა ცნობილი, რომ ისლამი ადამიანის სიყვარულის, კაცობრიობის გადარჩენის, სხვადასხვა ფერის, რასის, ერის, რწმენის ხალხთა თანაცხოვრების პრინციპზეა დაფუძნებული. ამისთვის საუკეთესო მაგალითია წმინდა მუჰამმედ შუამავლის განვლილი ცხოვრება, როგორც განსხვავებული რწმენის თუ ეთნიკური წარმომავლობის ადამიანების მიმართ პატივისცემით დამოკიდებულების უბადლო ნიმუში. მისი ქადაგებები თუ საქვეყნოდ ცნობილი შეგონებები ბოროტების ჩამდენების მიმართაც მიმტევებლობითი და შენდობითი დამოკიდებულების გამოხატულებაა. უზანაესი ღმერთი ყურანში მუსლიმებს მშვიდობის დაცვისკენ მოუწოდებს, ერთი ადამიანის მკვლელობის ჩამდენს კაცობრიობის გამანადგურებელის, ხოლო ერთი ადამიანის სიცოცხლის გადარმჩენს მთელი კაცობრიობის გადარჩენის ტოლფას ღირებულებად გვამცნობს.
ძალიან ვწუხვარ, როგორც მუსლიმი ამ საზარელი ფაქტის გამო, მით უფრო ეს საზარელი ქმედება გამიზნულია არამხოლოდ ღია საზოგადოების წინააღმდეგ მიმართული ტერორისტული აქტი, არამედ სრულიად მუსლიმი თემისაკენ მიმართული ტერორისტული აქტი. ეს გლობალური და დასაგმობი პრობლემა დაუყოვნებლივი სარეაქციო და სარეზონანსო საკითხია, რადგან აშკარად გამიზნულია მთელი სამყაროს მუსლიმი თემის სხვა აღმსარებლობის მორწმუნეებთან დასაპირისპირებლად. მტკიცედ მჯერა ფრანგი სამართალდამცავები არ დაუშვებენ ამ ფაქტით მანიპულირებას და არ მიეცემათ მავანს შუღლი დათესონ ჭეშმარიტ მუსლიმსა და სხვა აღმსარებლობის მქონე ადამიანებს შორის. ვერანაირი სიტყვის გამოხატულება ვერ იქნება საფუძველი ადამიანის მოკვლისა. ნებისმიერი უფლების დარღვევა უნდა განიხილებოდეს შესაბამის სამართლებრივ ფორმებში. იმედს ვიტოვებ მთელი მუსლიმური სამყარო გაილაშქრებს ამ საზარელი ფაქტის მიმართ და წერტილს დაუსვამს თანამედროვე სამყაროს ჭირს, რომელიც გვევლინება რელიგიურ ექსტრემიზმის სახით, რასაც არანაირი საერთო არ აქვს ჭეშმარით ისლამთან. მოვუწოდებ ისლამურ სამყაროს არ შემოიფარგლოს მხოლოდ მოცემული ფაქტის სიტყვიერი დაგმობით. გაატაროს ქმედითი ღონისძიებები მსგავსი საზარელი ფაქტების აღმოფხვრის მიზნით. ასევე ვთხოვ ყველას არ მოვახდინოთ აღნიშნული საკითხის განზოგადება ჭეშმარიტი მუსლიმებისა და ისლამის მიმართ. მინდა გულრწფელად იცოდეთ ნებისმიერი ნამდვილი მუსლიმი ისეთივე მწვავედ განიცდის ამ ფაქტს, როგორც ამ ფაქტის მსხვერპლთა ოჯახები“, - წერს ტარიელ ნაკაიძე.

ავტორი: ირაკლი მანაგაძე , ექსპრესნიუსის რეპორტიორი 2009 წლიდან

სოციალური ქსელები

ტრამპი: რუსეთი დათანხმდა დაპატიმრებული ამერიკელი საზღვაო ქვეითის გაცვლის გარეშე გათავისუფლებას

გერმანია განიხილავს რუსეთში დრონების მწარმოებლების წინააღმდეგ კიბერშეტევების განხორციელების ნებართვის მინიჭებას

ნასვამი და ნარკოტიკული თრობის ქვეშ მყოფი მძღოლების წინააღმდეგ ბრძოლა მკაცრდება - სტრატეგია

უკანა სავარძელზე ღვედი და სკოლამდელი ბავშვებისთვის სპეცსავარძლების გამოყენება სავალდებულო გახდება