სომხეთში ევროპული პოლიტიკური გაერთიანების (EPC) მე-8 სამიტის ფარგლებში უკრაინის პრეზიდენტთან საუბრის შესახებ ირაკლი კობახიძე აცხადებს, რომ ორ ქვეყანას შორის გამოწვევები დაგროვდა, თუმცა საქართველოსა და უკრაინის მეგობრობას ხანგრძლივი ისტორია აქვს და მზად არიან, ხალხთან და ხელისუფლებასთან ურთიერთობების მაქსიმალურად აღსადგენად ყველაფერი გააკეთონ.

„გამოწვევები არსებობს, ეს გამოწვევები დაგროვდა, თუმცა ჩვენს ქვეყნებს შორის მეგობრობას, ურთიერთობას აქვს ძალიან ხანგრძლივი ისტორია, აქედან გამომდინარე, მზად ვართ, გავაკეთოთ ყველაფერი, რომ ეს ურთიერთობები მაქსიმალურად აღდგეს და აისახოს ურთიერთობებში ხელისუფლებებს შორის. ყველა გონივრული ნაბიჯი შეიძლება ჩვენი მხრიდან გადაიდგას.

ჩვენ ვგულშემატკივრობთ უკრაინელ ხალხს, რომელიც არის დღეს ურთულეს მდგომარეობაში, ომის მდგომარეობაში, არის ურთულესი ეკონომიკური და სოციალური პირობები. ბუნებრივია, სოლიდარობას ვუცხადებთ უკრაინას, უკრაინელ ხალხს, შესაბამისად, ყველანაირად ვართ დაინტერესებული, არსებობდეს მეგობრული ურთიერთობები როგორც ქვეყნებს შორის, ასევე ხელისუფლებებს შორის. ჩვენი მხრიდან სრული მზაობა არსებობს, დანარჩენი ვნახოთ“, – განაცხადა კობახიძემ.

ირაკლი კობახიძეს შეახსენეს „ქართული ოცნების“ რიტორიკა უკრაინასთან მიმართებით, მათ შორის განცხადებები ომში ჩართვის მცდელობაზე, უკრაინის მიერ საქართველოს შიდა საქმეებში ჩარევის მცდელობაზე, სააკაშვილის საქართველოში შემოსვლასთან უკრაინის კავშირზე, შეფასება, რომ „უკრაინა არის კრიმინალების თავშესაფარი“.  ჟურნალისტები დაინტერესდნენ, ისაუბრა თუ არა კობახიძემ ზელენსკისთან ამ თემებზე.

კობახიძის თქმით, პრობლემები არსად წასულა, თუმცა უნდა იყვნენ მომავალზე ორიენტრირებული.

„გუშინდელი საუბრის დეტალებს ვერ ვიტყვი. პრობლემები რაც იყო, ბუნებრივია, რჩება, არსად წასულა არც ადეიშვილი, არც ლორთქიფანიძე, არც ის განცხადებები, რომლებიც კეთდებოდა, არც ელჩის გაწვევის გადაწყვეტილება და ა.შ.

ჩვენ გუშინ ვიყავით არსებითად კონცენტრირებული მეგობრულ საუბარზე და ეს იყო სულისკვეთება, სიღრმეში არ შევსულვართ, მათ შორის, პრობლემებთან დაკავშირებით. რა თქმა უნდა, პრობლემები იყო და ეს პრობლემები არსად წასულა, უბრალოდ უნდა ვიყოთ მომავალზე ორიენტირებული“, – განაცხადა კობახიძემ.

მისი მტკიცებით, ვოლოდიმირ ზელენსკი ნეგატიურ კონტექსტში არასდროს უხსენებია.

„მე პირადად ზელენსკი ნეგატიურ კონტექსტში არასდროს მიხსენებია და ამას აქვს ერთი მარტივი მიზეზი, მიუხედავად იმ პრობლემებისა, რომლებიც დაგროვილი იყო: ზელენსკი არის იმ ქვეყნის პრეზიდენტი, რომელიც არის დღეს ომის მდგომარეობაში და ეს ქვეყანა არის ჩვენი მეგობარი ქვეყანა, აქედან გამომდინარე, მე ყოველთვის ვუფრთხილდებოდი ჩემს სიტყვებს კონკრეტულად ბატონ პრეზიდენტ ზელენსკისთან დაკავშირებით. პრობლემები რაც იყო, არსად წასულა, თუმცა ჩვენ უნდა ვიყოთ მომავალზე ორიენტირებული“, – განაცხადა კობახიძემ.

 

ავტორი: ექსპრესნიუსი,

სოციალური ქსელები

მოსკოვის სასამართლომ კენედების ოჯახის წევრს დაუსწრებლად პატიმრობა მიუსაჯა

კოლუმბიის პრეზიდენტი - მიწისძვრის შემდეგ 265 ადამიანი დაიღუპა და 3 494 დაშავდა, უგზო-უკვლოდ დაკარგულად ითვლება 496

ნარკოდანაშაულის ბრალდებით 135 პირი დააკავეს, მათ შორის ნარკორეალიზაციაში სხვადასხვა ფორმით ჩართული 55 პირია

ივანიშვილის წარმომადგენელი იონათამიშვილი აფხაზეთში ბენზინის მიწოდებაზე კითხვების გამო ოპოზიციის აკრძალვას ითხოვს