გერმანია საქართველოს 20 მილიონ ევროს გამოუყოფს

2014-12-21 23:57:56, 5109 ნახვა

ეკონომიკა

გერმანიის მიერ მიღებული იქნა გადაწყვეტილება საქართველო-გერმანიის თანამშრომლობის ფარგლებში საქართველოსთვის 20 მილიონი ევროს შეღავათიანი სესხის გამოყოფის შესახებ, რომელიც მიმართული იქნება ახალი პროექტის „კლიმატისთვის უსაფრთხო ინფრასტრუქტურის პროგრამის” დასაფინანსებლად.

ამის შესახებ “ექსპრესნიუსს” ფინანსთა სამინისტროდან აცნობეს.

ოფიციალური შეტყობინება დღეს ფინანსთა მინისტრს ნოდარ ხადურს გერმანიის საელჩოს ეკონომიკური თანამშრომლობის განყოფილების ხელმძღვანელმა კატარინა დერკორნმა გადასცა.

როგორც უწყებაში აცხადებენ, აღნიშნული გადაწყვეტილება საქართველო-გერმანიის არსებული თანამშრომლობის გაგრძელებისა და გაძლიერების კიდევ ერთი დადასტურებაა. გერმანიის მთავრობის მხარდაჭერა საქართველოსთვის ფინანსურთან ერთად მნიშვნელოვანია ევროპასთან ურთიერთობის გაღრმავების კონტექსტში.

აღნიშნულთან დაკავშირებით სასესხო ხელშეკრულების გაფორმება საქართველოს შემდეგი შვიდი წლის განმავლობაში შეუძლია.

ცნობისთვის, დღემდე გერმანიის ფედერაციული რესპუბლიკის მიერ საქართველოსათვის გამოყოფილი რესურსი ფინანსური და ტექნიკური თანამშრომლობის ფარგლებში დაახლოებით 650 მილიონ ევროს შეადგენს.

Patreon P მხარი დაუჭირე "ექსპრესნიუსს" →

ავტორი: ირაკლი მანაგაძე , ექსპრესნიუსის რეპორტიორი 2009 წლიდან