გენადი არველაძე - კორეის რესპუბლიკა საქართველოსთვის ერთერთი მნიშვნელოვანი ქვეყანა, რომელთანაც ინვესტიციების მოზიდვის კუთხით უდიდესი პოტენციალი არსებობს

2021-06-25 15:18:26, 848 ნახვა

ეკონომიკა

24-25 ივნისს საქართველოსა და კორეის რესპუბლიკას შორის ინვესტიციების ხელშეწყობისა და დაცვის შესახებ შეთანხმების პროექტზე მოლაპარაკებების პირველი ოფიციალური რაუნდი გაიმართა, რომელიც ვიდეო-კონფერენციის ფორმატში ჩატარდა.

საქართველოს მხრიდან მომლაპარაკებელთა გუნდს ხელმძღვანელობდა ეკონომიკისა და მდგრადი განვითარების მინისტრის მოადგილე გენადი არველაძე. მხარეებს შორის პირველადი კონსულტაციები საინვესტიციო შეთანხმებასთან დაკავშირებით სეულში, 2019 წლის დეკემბერში გაიმართა.

„კორეის რესპუბლიკა არის ჩვენთვის ერთერთი მნიშვნელოვანი ქვეყანა, რომელთანაც უდიდესი პოტენციალი არსებობს ინვესტიციების მოზიდვის კუთხით. ამასთან, აღსანიშნავია ბოლო წლებში კორეელი ინვესტორების მხრიდან საქართველოთი სულ უფრო მზარდი დაინტერესება, მათ შორის ენერგეტიკის სფეროთი. ჩვენ დარწმუნებული ვართ, რომ საქართველოსა და კორეის რესპუბლიკას შორის ინვესტიციების ხელშეწყობისა და დაცვის სფეროში ორმხრივი შეთანხმების გაფორმება, რომელიც ინვესტიციების სფეროში თანამშრომლობის მყარ სამართლებრივ საფუძველს შექმნის, ხელს შეუწყობს კაპიტალის მოძრაობას, სამეწარმეო ინიციატივების სტიმულირებასა და ორივე სახელმწიფოს კეთილდღეობას, ხელშემკველ მხარეთა ეკონომიკურ განვითარებას, ეკონომიკური რესურსების ეფექტური გამოყენების შესაძლებლობასა და ცხოვრების დონის ამაღლებას" - განაცხადი მინისტრის მოადგილე გენადი არველაძემ.

შეთანხმების პროექტის დებულებები მოიცავს ინვესტიციებისა და ინვესტორების დაცვის მექანიზმებს, მხარეთა დავის შემთხვევაში, მათი გადაჭრის გზებს, რაც ხელს შეუწყობს მხარეთა შორის საინვესტიციო საქმიანობის განვითარებასა და ინვესტიციების სფეროში ურთიერთობების შემდგომ გაღრმავებას.

სტატისტიკური მონაცემების თანახმად, საქართველოში კორეის რესპუბლიკიდან პირველი ინვესტიცია განხორციელდა 1997 წელს, მას შემდეგ, 2020 წლის ჩათვლით, საერთო ინვესტიციის მოცულობამ შეადგინა 204.32 მლნ. აშშ დოლარი, მათ შორის 2016-2020 წწ. 123.79 მლნ. აშშ დოლარი.

საქართველოს მხრიდან მომლაპარაკებელთა შორის არიან საქართველოს საგარეო საქმეთა, ეკონომიკისა და მდგრადი განვითარების, იუსტიციისა და ფინანსთა სამინისტროების წარმომადგენლები.

Patreon P მხარი დაუჭირე "ექსპრესნიუსს" →

ავტორი: NS (სტატია დაფინანსებულია),