გიორგი ჩერქეზიშვილმა აზიის განვითარების ბანკის დელეგაციასთან მიმდინარე და სამომავლო პროექტები განიხილა

2018-07-05 15:50:37, 1089 ნახვა

ეკონომიკა

ეკონომიკისა და მდგრადი განვითარების მინისტრი გიორგი ჩერქეზიშვილი აზიის განვითარების ბანკის დელეგაციას შეხვდა, რომელთანაც მიმდინარე პროექტები და სამომავლო თანამშრომლობის ძირითადი ასპექტები განიხილა.

ბანკის დელეგაციის შემადგენლობაში იყვნენ აღნიშნული საფინანსო ორგანიზაციის აღმასრულებელი დირექტორი ჰელმუტ ფიშერი და ბანკის მუდმივი წარმომადგენლობის ხელმძღვანელი იეშიმ ელჰან-კაიალარი. შეხვედრას ასევე დაესწრნენ ეკონომიკისა და მდგრადი განვითარების მინისტრის მოადგილეები გენადი არველაძე და რომეო მიქაუტაძე, სს საქართველოს ენერგეტიკის განვითარების ფონდის დირექტორი თორნიკე რიჟვაძე.

შეხვედრაზე ქართულმა მხარემ ვრცლად ისაუბრა საქართველოს ეკონომიკურ ტენდენციებზე, ლიბერალურ ბიზნეს გარემოსა და თავისუფალი ვაჭრობის შეთანხმებებზე, რომლებმაც გაზარდეს საერთაშორისო ინვესტორების ინტერესი საქართველოს ეკონომიკის მიმართ.
ასევე ყურადღება გამახვილდა საქართველოს წარმატებებს საერთაშორისო რეიტინგებში, მათ შორის, მსოფლიო ბანკის ავტორიტეტულ „ბიზნეს კეთების სიმარტივის" 2018 წლის რეიტინგზე, რომლის თანახმადაც საქართველოს მე-9 პოზიცია უკავია.

შეხვედრაზე მხარეებმა განიხილეს საქართველოს ეკონომიკის სხვადასხვა სექტორებში არსებული ვითარებაზე, განსაკუთრებული აქცენტი გაკეთდა ენერგეტიკაზე, საფინანსო სექტორზე, აგრეთვე საგზაო ინფრასტრუქტურაზე, რომლის ერთ-ერთი მსხვილი დონორიც აზიის განვითარების ბანკია.
მხარეებმა ასევე დადებითად შეაფასეს საქართველოსა და აზიის განვითარების ბანკის თანამშრომლობა CAREC - ის (ცენტრალური აზიის რეგიონალური თანამშრომლობის პროგრამა) ფორმატში.

შეხვედრის დასასრულს, მხარეები შეთანხმდნენ, რომ განაგრძობენ თანამშრომლობას რეფორმების განხორციელებისა და ინფრასტრუქტურული და სხვა სახის სტრატეგიული პროექტების განხორციელების მიმართულებით.

(NS)

Patreon P მხარი დაუჭირე "ექსპრესნიუსს" →

ავტორი: ,

სოციალური ქსელები