ევროპის კვირეულის ფარგლებში, სპექტაკლის "იქ, სადაც შენი სახლია" პრემიერა გაიმართა

2015-05-07 22:23:55, 6122 ნახვა

კულტურა

გრიბოედოვის სახელობის სახელმწიფო დრამატული თეატრის სცენაზე ახალგაზრდა რეჟისორთა სპექტაკლის "იქ, სადაც შენი სახლია" პრემიერა გაიმართა. 5 მინიატურისგან შემდგარი სპექტაკლის მიზანი ქართული და ევროპული ღირებულებების ერთობის წარმოჩენა იყო. საქართველოში მსგავსი ხასიათის ღონისძიება პირველად განხორციელდა.
"დღეს ევროპის კვირეულის ფარგლებში გაიმართა პრემიერა "იქ, სადაც შენი სახლია", სპექტაკლი შექმნეს ახალგაზრდა რეჟისორებმა, რომელიც ძირითადად მოგვითხრობს ევროპული და ქართული ფასეულობების ერთობაზე. ნატოსა და ევროკავშირის შესახებ საინფორმაციო ცენტრის ინიციატივაა და პირველად ჩატარდა მსგავსი ღონისძიება საქართველოში. ჩვენი მიზანია, რომ ევროპის კვირეულში და, არა მარტო ევროპის კვირეულში, ჩავრთოთ ყველა, ვისაც კი ინტერესი აქვს ამ პროცესის მიმართ. ამ შემთხვევაში ჩვენ ახალგაზრდების ინიციატივას დავუჭირეთ მხარი, ვნახეთ მათ მიერ შექმნილი სპექტაკლი და იმედი გვაქვს, ამ სპექტაკლით საშუალება მოგვეცემა რაიონებში, რეგიონებში, სხვადასხვა დაწესებულებებში საუბარს ჩავუყაროთ საფუძველი ევროპულ და ქართულ ფასეულობათა ერთობაზე",-განაცხადა სსიპ ნატოსა და ევროკავშირის შესახებ საინფორმაციო ცენტრის ხელმძღვანელმა ელენე გოცაძემ.
წარმოდგენის დასრულების შემდეგ მაყურებელს საქართველოს პარლამენტის თავმჯდომარე დავით უსუფაშვილმა მიმართა.საპატიო სტუმრის რანგში ღონისძიებაში მონაწილეობა ევროპის საბჭოს საპარლამენტო ასამბლეის პრეზიდენტმა ან ბრასერმა მიიღო.
ღონისძიებას საქართვრლოს საკანონმდებლო და აღმასრულებელი ხელისუფლების, დილპლომატიური კორპუსისა და სამოქალაქო საზოგადოების წარმომადგენლები დაესწრნენ.
ღონისძიება სსიპ ნატოსა და ევროკავშირის შესახებ საინფორმაციო ცენტრის ორგანიზებით, ევროპულ და ევროატლანტიკურ სტრუქტურებში ინტეგრაციის საკითხებში სახელმწიფო მინისტრის აპარატისა და კულტურისა და ძეგლთა დაცვის სამინისტროს მხარდაჭერით განხორციელდა.