საგზაო მოძრაობის შესახებ საქართველოს კანონში, საქართველოს ადმინისტრაციულ სამართალდარღვევათა კოდექსსა და პოლიციის შესახებ საქართველოს კანონში ცვლილებები დღეიდან ძალაში შევიდა.

ერთ-ერთ ცვლილებასთან დაკავშირებით, მედიაში გავრცელდა ინფორმაცია, რომ დღეიდან ბუნებრივ აირზე მომუშავე ავტომობილების მძღოლებს, აირბალონიანი სისტემის უსაფრთხოების დამადასტურებელი სერთიფიკატის არ ქონის შემთხვევაში, გარდა არსებული 100 ლარიანი ჯარიმისა, მართვის მოწმობაზე 15 ქულა დააკლდებათ. აღნიშნულმა საზოგადოებაში აჟიოტაჟი გამოიწვია. ბოლო რამდენიმე დღის განმავლობაში, კომპანიებს, რომლებიც აირბალონიანი მოწყობილობების ინსპექტირებას ახორციელებენ, უამრავმა მოქალაქემ მიმართა.

კანონში შეტანილი ცვლილებების მიუხედავად, აღნიშნული რეგულაციები ჯერჯერობით არ მოქმედებს. კერძოდ, როგორც დღეს შინაგან საქმეთა სამინისტრომ განმარტა, ვიდრე არ ამოქმედდება ტექდათვალიერების სისტემა და არ დადგინდება სტანდარტები ამ სფეროში, ბუნებრივ აირზე მომუშავე სატრანსპორტო საშუალებების მძღოლები ისარგებლებენ ისეთივე სამართლებრივი რეჟიმით, როგორც ეს იყო 2017 წლის 1 ივლისამდე და მათ ქულების შემცირება არ შეეხებათ.

რაც შეეხება ჯარიმას, 2010 წლის აგვისტოში მიღებული ადმინისტრაციულ სამართალდარღვევათა კოდექსის 119-ე მუხლის მე-5 ნაწილის თანახმად, იმ სატრანსპორტო საშუალების მართვა, რომელიც თვითნებურად არის გადაკეთებული (გადაკეთებულია საწვავის ავზი, ძარა, ან დაყენებულია ბუნებრივი აირის სისტემა, ან სხვაგვარადაა შეცვლილი სატრანსპორტო საშუალების კონსტრუქცია და იგი არ შეესაბამება საგზაო მოძრაობის უსაფრთხოების უზრუნველყოფის მოთხოვნებს ან/და ქარხანა-დამამზადებლის სტანდარტებს), – გამოიწვევს დაჯარიმებას 100 ლარის ოდენობით. თუმცა, აღსანიშნავია, რომ ამ შემთხვევაშიც, ვინაიდან ტექდათვალიერების სისტემა ჯერჯერობით არ ამოქმედებულა, მძღოლებს შესაბამისი ცნობის არ ქონის გამო, ჯარიმები არ ეკისრებათ.

შენიშვნა: გამონაკლისია იმ სატრანსპორტო საშუალებების მძღოლები, რომელთა ავტომობილები ექვემდებარებიან სავალდებულო ტექდათვალიერებას. (2015 წლის 1-ელი მარტიდან გზისთვის ვარგისობაზე სავალდებულო პერიოდულ ტესტირებას, ე.წ. ტექდათვალიერებას ექვემდებარება საქართველოს ტერიტორიაზე არსებული და დადგენილი წესით რეგისტრირებული ავტოსატრანსპორტო საშუალებები, რომლებიც ახორციელებენ ადგილობრივ საქალაქო რეგულარულ სამგზავრო გადაყვანას, საერთაშორისო გადაყვანა-გადაზიდვას, სახიფათო ტვირთის გადაზიდვას და რომელთაც სამი ტონა და მეტი ტვირთამწეობა გააჩნიათ). ამ კატეგორიის ავტოსატრანსპორტო საშუალების ტექნიკური გამართულობის დამადასტურებელი მოწმობის არ ქონის გამო, მძღოლს დაეკისრება ჯარიმა და მართვის მოწმობაზე 15 ქულა ჩამოაკლდება.

ამავე თემაზე: რომელი დარღვევისთვის რამდენი ქულა დააკლდებათ მძღოლებს - მართვის მოწმობის 100-ქულიანი სისტემა.

ავტორი: ირაკლი მანაგაძე , ექსპრესნიუსის რეპორტიორი 2009 წლიდან

სოციალური ქსელები

მთავრობამ თელავის მუნიციპალიტეტს სტიქიის სალიკვიდაციოდ ნახევარი მილიონი ლარი გამოუყო

ძალადობით ჩადენილი ძარცვის ბრალდებით ორი პირია დაკავებული, მათ შორის ერთი არასრულწლოვანი

კორუფციის ბრალდებით ჩინოვნიკები დააკავეს, მათ ქრთამი აიღეს

ევროკავშირის უმაღლესმა დიპლომატმა ომის დაწყების შემდეგ რუსეთის წინააღმდეგ „ყველაზე მასშტაბური“ სანქციების პაკეტი გამოაცხადა