საპატრიარქოს იურისტი: შორენა თეთრუაშვილს ე.წ. ციანიდის საქმეზე დაზარალებულის სტატუსი მიენიჭა

2017-03-06 13:39:31, 2363 ნახვა

სამართალი საზოგადოება

საპატრიარქოს იურისტის, ედიშერ ქარჩავას განცხადებით, პატრიარქის მდივან-რეფერენტს შორენა თეთრუაშვილს ე.წ. ციანიდის საქმეზე დაზარალებულის სტატუსი მიენიჭა.

ქარჩავას ინფორმაციით, თეთრუაშვილი პროკურატურამ რამდენიმე დღის წინ დაკითხა.

იურისტის თქმით, სასამართლო განჩინებით დღეს მთავარი პროკურატურის წარმომადგენლები საპატრიარქოში იყვნენ მისული და დეკანოზ მამალაძის პირად ინფორმაციაზე დოკუმენტაცია გამოითხოვეს.

როგორც ქარჩავამ აღნიშნა, საპატრიარქოს სხვა თანამშრომლებიც დაიკითხნენ, რომელთაც დაკავებულ დეკანოზ გიორგი მამალაძესთან უშუალო შეხება ჰქონდათ.

მანვე დასძინა, რომ დაკითხულთა შორის სასულიერო პირები არ ყოფილან.

შეგახსენებთ, დეკანოზი გიორგი მამალაძე პროკურატურის თანამშრომლებმა მკვლელობის მომზადების ფაქტზე ბრალდებულის სახით 10 თებერვალს დააკავეს. 12 თებერვალს საქართველოს პროკურატურის შუამდგომლობის საფუძველზე თბილისის საქალაქო სასამართლოს განჩინებით გიორგი მამალაძეს აღკვეთის ღონისძიების სახით პატიმრობა შეეფარდა. იგი რუსთავის მე-6 პენიტენციურ დაწესებულებაში იმყოფებოდა, 15 თებერვალს კი, ე.წ. მატროსოვის ციხეში გადაიყვანეს. აღსანიშნავია, რომ დეკანოზი წარდგენილ ბრალს არ აღიარებს

Patreon P მხარი დაუჭირე "ექსპრესნიუსს" →

ავტორი: ირაკლი მანაგაძე , ექსპრესნიუსის რეპორტიორი 2009 წლიდან