მიმდინარე წლის 10 მაისს, 20:00 საათზე ქალაქ თბილისის მერიის ორგანიზებითა და ანსამბლ „გეორგიკას" მონაწილეობით, ხელოვნების სასახლე მეოცე საუკუნის ლეგენდარული მოცეკვავის მარის ლიეპას უნიკალური ფოტოებისა და კოსტიუმების ექსპოზიციას უმასპინძლებს.

მარის ლიეპას საფლავზე ორი სიტყვა წერია: „გამოჩენილი მოცეკვავე",  მაგრამ დრომ და შთამომავლობამ მცირედი კორექტივები შეიტანა ამ ფორმულირებაში და მას „გენიალური მოცეკვავე" უწოდა.

ის იყო მრავალი სახელმწიფო ჯილდოს, მსოფლიოს ქორეოგრაფიული საზოგადოებების არაერთი პრიზის მფლობელი და კიდევ ერთი მეტად მნიშვნელოვანი ორდენის კავალერი, ეს იყო ხალხთა მეგობრობის ორდენი.

საქართველოში, ვახტანგ ჭაბუკიანის სამშობლოში, ეთაყვანებოდნენ მის მიერ განსახიერებულ როლებს სცენაზე, უყვარდათ მისი კინოგმირები და რაც მთავარია, ემადლიერებოდნენ ულამაზესი და წარმატებული დუეტის: ნინო ანანიაშვილი-ანდრის ლიეპა,შექმნის გამო.

ვირტუოზი შემოქმედი ვირტუოზული დინასტიის ფუძემდებელიც აღმოჩნდა, მისმა შვილებმა: ილზემ და ანდრისმა, გააგრძელეს და გაამრავლეს მამის დაწყებული საქმეები, ისინი მარის ლიეპას მიერ სცენაზე თუ ცხოვრებაში დამკვიდრებული რაფინირებული და გამორჩეული სტილის ღირსეული გამგრძელებლები გახდნენ, ბრწყინავდნენ მსოფლიოს უდიდესი თეატრების სცენებზე და სცენის მიღმაც მრავალმხრივად საინტერესო და სასარგებლო მოღვაწეობას აგრძელებენ. მარის ლიეპას სახელობის საქველმოქმედო ფონდის ამოქმედება ამის კიდევ ერთი მაგალითია.ფონდი უკვე 20 წელზე მეტია არსებობს და ხელოვნების ხელშეწყობას ემსახურება. ამ წლების მანძილზე ლიეპების ფონდმა არაერთი სასიკეთო და საინტერესო პროექტი განახორციელა მსოფლიოს სხვადასხვა ქვეყანაში და, რასაკვირველია. საქართველოშიც.  ილზე ლიეპას შესანიშნავი „თეატრალური ზღაპრები" ჯერ ქართულად ითარგმნა და მერე გამოვიდა მშობლიურ ლატვიურ ენაზე რიგაში, ანდრის ლიეპა კი იყო პირველი მოწვეული ქორეოგრაფი, რომელმაც განახლებული ოპერისა და ბალეტის თეატრის სცენაზე განახორციელა ი.სტრავინსკის ბალეტის („ფასკუნჯი") დადგმა. გასაკვირი არ არის, რომ  წლეულს მარის ლიეპას საიბულეო ღონისძიებები სწორედ თბილისში იღებს სათავეს.

გამოფენაც, რომელიც ეძღვნება გამორჩეული ხელოვანის 80 წლის იუბილეს, ეწყობა სწორედ ქალაქ თბილისის მერიის ხელშეწყობით, საქართველოს თეატრის, კინოს, მუსიკისა და ქორეოგრაფიის მუზეუმის საგამოფენო სივრცეში და ქართული ანსამბლის - „გეორგიკას" მონაწილეობით, რომელიც მარის ლიეპას შვილებთან - ილზე და ანდრის ლიეპებთან ერთად, საზოგადოებას სასიამოვნო სიურპრიზს შესთავაზებს.

ავტორი: ირაკლი მანაგაძე , ექსპრესნიუსის რეპორტიორი 2009 წლიდან

სოციალური ქსელები

მაკრონმა სტარმერს მადლობა გადაუხადა და საფრანგეთსა და ბრიტანეთს შორის თანამშრომლობის გაგრძელება გამოაცხადა

ბრიტანეთის პრემიერ-მინისტრი თანამდებობიდან გადადგა

პოლონეთმა ზელენსკის მიერ დაბრუნებული „თეთრი არწივის ორდენის“ მიღება დაადასტურა

გვარამია ენმ-ზე - ხალხი ერთ პარტიაშია და ბრიფინგებით, სატელევიზიო ეთერებით და სტატუსებით ელაპარაკება ერთმანეთს და წყევლის და აგინებს