სასტუმრო Rooms Hotel-ში ნატო-საქართველოს პროფესიული განვითარების პროგრამის მე-4 ყოველწლიური კონფერენცია იმართება.კონფერენცია საქართველოს თავდაცვის მინისტრის მოადგილემ ანა დოლიძემ გახსნა. 

როგორც "ექსპრესნიუსს" თავდაცვის სამინისტროდან აცნობეს, კონფერენციაზე პროფესიული განვითარების პროგრამების დელეგატები და საჯარო მოხელეები, ნატოს შტაბ-ბინის წარმომადგენლებთან ერთად საჯარო სექტორში არსებულ მდგომარეობას, მიმდინარე რეფორმებს და საქართველოში საჯარო მოხელეთა პროფესიული განვითარების შესაძლებლობებს განიხილავენ. 

უწყების ინფორმაციით, ღონისძიების მიზანია ქართველ საჯარო მოხელეებს მიეცეს საშუალება გაიღრმავონ ცოდნა და გაუზიარონ ერთმანეთს გამოცდილება უსაფრთხოების სექტორის მთავარი გამოწვევების, საჯარო სამსახურის რეფორმების წარმატებით განხორციელებისთვის საჭირო ნაბიჯების, მართვის თანამედროვე მეთოდებისა და საკუთარი უწყვეტი პროფესიული ზრდის ხელშეწყობის მიმართულებით.

„გამართული საჯარო სამსახურის ჩამოყალიბება სახელმწიფოს მშენებლობის განუყოფელი ნაწილია. ჩვენი საჯარო სამსახურის გამართვისთვის ძალიან მნიშვნელოვანია ყველა თეთრი, რომელიც ჩაიდება ტრენინგებში და ცოდნის გაზიარების საქმეში. დღევანდელი კონფერენციის მიზანი იყო შეგვეჯამებინა ნატოს პროფესიული განვითარების პროგრამის (PDP) საქმიანობა. ასევე გველაპარაკა იმ სფეროებზე, რომლებიც გამოწვევად რჩება და რომელზეც მომავალ დეკადაში გავამახვილებთ ყურადღებას. შეიძლება მომავალში PDP-მ აღარ იარსებოს თავდაცვის სამინისტროსთან მიმართებაში ზუსტად იმ ფორმით, როგორც არსებობს, მაგრამ იქნება ნატოს ინსტიტუციური აღმშენებლობის სკოლა. ეს ის სკოლა იქნება, რომელიც შეითავსებს ამ ფუნქციას, რომ გააძლიეროს ჩვენი საჯარო მოხელეები და ცოდნა გაუზიაროს მათ რეგიონში და საერთაშორისო არენაზე“, - განაცხადა ანა დოლიძემ.

ცნობისთვის, ყოველწლიური კონფერენცია 200-მდე სტუმარს მასპინძლობს. კონფერენციის ბოლოს ნატო-საქართველოს პროფესიული განვითარების პროგრამის გამოფენა გაიმართება, სადაც დელეგატები პროგრამის და ქართველი პარტნიორების ერთობლივი წარმატებული პროექტების შესახებ დეტალური ინფორმაციის მიღებას შეძლებენ. ნატო-საქართველოს პროფესიული განვითარების პროგრამა სატრასტო ფონდია, რომელიც ალიანსის ქვეყნებიდან ფინანსდება. მისი მიზანია, საჯარო მოხელეთა პროფესიული განვითარების და მიმდინარე რეფორმების მხარდაჭერის გზით ხელი შეუწყოს საქართველოს ნატოში ინტეგრაციას.

ავტორი: ირაკლი მანაგაძე , ექსპრესნიუსის რეპორტიორი 2009 წლიდან

სოციალური ქსელები

სინდისის პატიმრების ოჯახის წევრები საზოგადოებას აქტიურობისკენ და მხარდაჭერისკენ მოუწოდებენ

დეკანოიძე - ოცნება თავად ასხივებს უწიგნურობას, ძალადობას და სიძილვილს, თუმცა სხვებს აპატიმრებს

ქართველი დიპლომატები და საზოგადოება რუსეთის მიერ საქართველოს ოკუპირებულ რეგიონების ანექსიური პროცესებისა და უსაფრთხოების რისკების გაძლიერებასთან დაკავშირებით საერთაშორისო პარტნიორებს მიმართავს

უკრაინამ ვოლგოგრადში მდებარე „ისკანდერის“ სარაკეტო ქარხანას „ფლამინგოს“ რაკეტები დაარტყა