2022 წლის დეკემბერში, რუსეთში შეიქმნა საიდუმლო სპეცსამსახურების დანაყოფი, რომელიც კრემლის ოპონენტებს საზღვარგარეთ კლავდა და იტაცებდა, იტყობინება The Insider, უსაფრთხოების სამსახურებში არსებულ წყაროებზე დაყრდნობით. გამოცემის ცნობით, დანაყოფი, სახელწოდებით „ცენტრი 795“ (სამხედრო დანაყოფი 75127), შეიქმნა გენერალური შტაბის გადაწყვეტილებით, უკრაინასთან სრულმასშტაბიანი ომის დაწყების შემდეგ სპეცსამსახურების შესაძლებლობების გაფართოების მიზნით.

ცენტრი ჩაფიქრებული იყო, როგორც სრულად ავტონომიური სტრუქტურა, რომელსაც შეეძლო თავდაცვის სამინისტროსგან დამოუკიდებლად მოქმედება. ცენტრის ხელმძღვანელობა უშუალოდ გენერალური შტაბის უფროსს, ვალერი გერასიმოვს ან მის მოადგილეს ექვემდებარებოდა.

ცენტრში შედიოდა დაახლოებით 500 ოფიცერი, რომლებიც შერჩეული იყვნენ ФСБ-დან (მათ შორის „ალფა“ და „ვიმპელი“, ГРУ და ბელარუსის КГБ. ეს პირველი შემთხვევაა, როდესაც თავდაცვის სამინისტრო და ФСБ ასეთი მასშტაბით თანამშრომლობენ. მნიშვნელოვანი როლი შეასრულეს გენერალ ანდრეი ავერიანოვის გუნდის ყოფილმა წევრებმა, რომლებიც ადრე ГРУ-ში 29155-ე დანაყოფის ხელმძღვანელობას ასრულებდნენ. „ალფას“ ყოფილი ოფიცერი დენის ფისენკო ცენტრი 795-ის უშუალო მეთაური გახდა. დანაყოფის ხელფასები რიგითი ოფიცრებისთვის ნახევარ მილიონ რუბლს, ხოლო მენეჯმენტისთვის 3 მილიონ რუბლს აღწევს - ეს გადახდები კალაშნიკოვის კონცერნიდან მოდის თავდაცვის სამინისტროსგან მიღებული დანამატების გარდა, იტყობინება „The Insider“.

დანაყოფი მოსკოვის მახლობლად, კუბინკაში, „კალაშნიკოვის კონცერნის“ სასწავლო ცენტრშია განთავსებული. ცენტრს აფინანსებენ „კალაშნიკოვის“ თანამფლობელი ანდრეი ბოკარევი და „როსტეკის“ აღმასრულებელი დირექტორი სერგეი ჩემეზოვი, ვლადიმერ პუტინის ახლო მეგობარი და კოლეგა.

სტრუქტურა სამ დირექტორატად არის დაყოფილი: დაზვერვის, თავდასხმის და საბრძოლო მხარდაჭერის. სადაზვერვო ცენტრს 19 დეპარტამენტი აქვს, მათ შორის სნაიპერული დანაყოფი, რაც იმაზე მიუთითებს, რომ ის მიზნობრივი მკვლელობებისთვის ემზადება. თავდაპირველად, ცენტრი უკრაინაში ოპერაციებისთვის შეიქმნა (თავდასხმები სამეთაურო პუნქტებსა და სამხედრო და პოლიტიკურ ლიდერებზე), მაგრამ, როგორც გამოცემა აღნიშნავს, მცირე წარმატებას მიაღწია. მოგვიანებით, მისი მისიები გაფართოვდა და მოიცავდა სამხედრო ობიექტების დივერსიას და საზღვარგარეთ ოპოზიციის ფიგურებისა და ჟურნალისტების მკვლელობის მცდელობებს.

ერთ-ერთი ოპერაცია სრულიად ჩაიშალა. საბოლოოდ, ცენტრის ოფიცერი დენის ალიმოვი, 24 თებერვალს, კოლუმბიაში, ბოგოტას აეროპორტში, შეერთებული შტატების მოთხოვნით დააკავეს. The Insider-ის ცნობით, მას ლონდონში მცხოვრები ჩეჩენი ოპოზიციონერი პოლიტიკოსის, ახმედ ზაკაევის ოჯახის წევრების გატაცება დაევალა. ამ მიზნით, ალიმოვმა შეერთებულ შტატებში მცხოვრები სერბი, დარკო დუროვიჩი, დაიქირავა. ენობრივი ბარიერის გამო (ალიმოვი არ ფლობდა ინგლისურ და სერბულ ენებს, ხოლო დუროვიჩი - რუსულს), ისინი Google Translate-ის საშუალებით ურთიერთობდნენ, ინსტრუქციებს რუსულიდან სერბულზე და უკან თარგმნიდნენ.

FBI-მ სასამართლოს ბრძანება მიიღო ტრანზაქციების ჟურნალზე წვდომისა და ყველა მიმოწერის რეალურ დროში წაკითხვის შესახებ. დუროვიჩი აშშ-ში 2025 წლის მარტში დააკავეს და ალიმოვი ამჟამად აშშ-ში ექსტრადიციას ელოდება. მას ბრალი ედება მკვლელობის შეთქმულებაში, ადამიანის გატაცების შეთქმულებაში და ტერორიზმის დაფინანსებაში.

ავტორი: ექსპრესნიუსი,

სოციალური ქსელები

EU-ის წარმომადგენლობა: ვულოცავთ შიო III-ს სრულიად საქართველოს კათოლიკოს-პატრიარქად გამორჩევას

მეუფე ნიკოლოზი ილია მეორის წმინდანად შერაცხვას ითხოვს - მიმართვა, რომლის წაკითხვაც მიტროპოლიტს გაფართოებულ კრებაზე სურდა

მეუფე მიქაელი სინდისის პატიმრებზე: დიდი სიამოვნებით გამოვუშვებდი ყველას

რუსეთში ნავთობგადამამუშავებელ ქარხნებზე უკრაინული დრონების დარტყმების გამო, ბენზინის დეფიციტია