2024-05-03 10:26:58, 460 ნახვა

---

მილერი - ბლინკენი „უცხოური გავლენის გამჭვირვალობის შესახებ“ კანონპროექტთან დაკავშირებულ მოვლენებს ყურადღებით აკვირდება

ამერიკის შეერთებული შტატების სახელმწიფო დეპარტამენტის სპიკერმა, მეთიუ მილერმა „უცხოური გავლენის გამჭვირვალობის შესახებ“ კანონპროექტთან დაკავშირებით ბრიფინგზე ისაუბრა.

მილერმა კითხვაზე, აშშ-ის სახელმწიფო მდივანი რამდენად არის ჩართული ამ საკითხებში, განაცხადა, რომ სახლმწიფო მდივანი, ენტონი ბლინკენი მიუხედავად იმისა, რომ მოგზაურობს მსოფლიოს გარშემო, მაინც ყურადღებით ადევნებს თვალს საქართველოში მიმდინარე მოვლენებს და მას ამის შესახებ ინფორმაცია რეგულარულად აქვს.

გარდა ამისა, მეთიუ მილერმა კიდევ ერთხელ გამოხატა შეშფოთება აღნიშნულ კანონმდებლობასთან დაკავშირებით და აღნიშნა, რომ „ქართული ოცნების მეთაურთა ანტიდასავლური რიტორიკა საფრთხეს უქმნის საქართველოს ევროატლანტიკურ გზას და ძირს უთხრის აშშ-საქართველოს ურთიერთობას“.

„ჩვენ ასევე შეშფოთებული ვართ და ვგმობთ ცრუ ნარატივს, რომელსაც ხელისუფლების წარმომადგენლები იყენებენ კანონმდებლობისა და ანტიდასავლური რიტორიკის დასაცავად. „ქართული ოცნების“ ლიდერებმა საქართველო დააყენეს საეჭვო ტრაექტორიაზე, რაც საფრთხეს უქმნის საქართველოს ევროატლანტიკურ გზას და ძირს უთხრის აშშ-საქართველოს ურთიერთობას. ეს ჯერ კიდევ კანონპროექტია და არ ვაპირებ კომენტარის გაკეთებას კონკრეტულ პასუხებზე, რომლებიც შეიძლება, განვახორციელოთ, მაგრამ, ვფიქრობ, ჩვენ საკმაოდ ნათლად განვაცხადეთ, რამდენად სერიოზულად ვუყურებთ ამ საკითხს და რამდენად შეშფოთებული ვართ.

შემიძლია, დარწმუნებით გითხრათ, რომ სახელმწიფო მდივანი ენტონი ბლინკენი ყურადღებით ადევნებს თვალს. მიუხედავად იმისა, რომ მოგზაურობს მსოფლიოს გარშემო, სხვადასხვა ქვეყანაში, ეს არის საკითხი, რომელზე ინფორმაციაც რეგულარულად აქვს“,- განაცხადა მეთიუ მილერმა, რომლის ქართულ ენაზე თარგმნილ კომენტარსაც საზოგადოებრივი მაუწყებელი ავრცელებს.

---

ავტორი: ექსპრესნიუსი,

---

დღის თემა

მთავარი თემა

ინტერვიუ - ექსკლუზივი