რუსეთის თავდაცვის უწყების მტკიცებით, ვორონეჟსა და ბელგოროდში დრონებით შეტევა განხორციელდა [ვიდეო]

2024-01-16 10:03:48, 868 ნახვა

მსოფლიო

რუსეთის თავდაცვის სამინისტროს მტკიცებით, წუხელ ვორონეჟისა და ბელგოროდის რეგიონებში დრონებით შეტევა მოიგერიეს. ამის შესახებ რუსული სამთავრობო-პროპაგანდისტული მედია "რია ნოვოსტი" წერს.

თავდაცვის უწყების განცხადების თანახმად, საჰაერო თავდაცვის სისტემებმა გაანადგურეს 5 და შეაჩერეს 3 უკრაინული უპილოტო საფრენი აპარატი ვორონეჟის ტერიტორიაზე, ხოლო 4 დრონი ბელგოროდში დააკავეს.

„ამ ღამის განმავლობაში შეჩერდა კიევის რეჟიმის მცდელობა, განეხორციელებინა ტერორისტული თავდასხმები საავიაციო ტიპის უპილოტო საფრენი აპარატების გამოყენებით რუსეთის ფედერაციის ტერიტორიაზე არსებულ ობიექტებზე",- აღნიშნულია რუსეთის თავდაცვის განცხადებაში.

გუბერნატორ ალექსანდრე გუსევის თქმით, მომხდარის გამო, ვორონეჟში საგანგებო მდგომარეობა გამოცხადდა.

მისი ინფორმაციით, ვორონეჟში თვითმფრინავის ნამსხვრევების ჩამოვარდნისას 10 წლის გოგონა დაშავდა, 2 მაღალსართულიანი კორპუსი და რამდენიმე კერძო სახლი კი, დაზიანდა.