ჩემი მეგობრები საქართველოდან ბევრს აკეთებენ, რომ მოხდეს იმპლემენტაცია. არის საკითხები, რომლებიც სამომავლოდ სამსჯელოა, თუმცა ახლა პოლიტიკურმა სიტუაციამ პოზიტიური გადაწყვეტილებისკენ უნდა გვიბიძგოს, - ამის შესახებ ლიეტუვის პრეზიდენტმა, გიტანას ნაუსედამ ევროპული საბჭოს სამიტის დაწყებისას განაცხადა.

ნაუსედას თქმით, ლიეტუვა მხარს უჭერს გაფართოების პაკეტს, რადგან უკრაინელი, მოლდოველი და ქართველი ერი იმსახურებს პოზიტიურ გადაწყვეტილებას.

"უკრაინისა და მოლდოვისთვის მოლაპარაკების გახსნა და კანდიდატის სტატუსი საქართველოსთვის - ეს გადაწყვეტილება ჩვენს ხელშია. ან მივიღებთ მას, ან ამ შანსს გავუშვებთ. ჩემი ქვეყნის პოზიცია პირველივე დღიდან ნათელია, ჩვენ გაფართოების პაკეტს მხარს ვუჭერთ. უკრაინელი, მოლდოველი, ქართველი ერი პოზიტიურ გადაწყვეტილებას იმსახურებს და ჩვენ უნდა მივიღოთ ეს გადაწყვეტილება.

ჩემი აზრია, რომ ჩვენ თუ ჩავიჭრებით, ბოროტად გამოვიყენებთ ერთსულოვნების პრინციპს, უფრო და უფრო მეტი კითხვა დაისმება. უნგრეთისთვისაც ასევე მნიშვნელოვანია ერთსულოვნების პრინციპის დაცვა, მაგრამ ჩვენ არ უნდა გამოვიყენოთ ბოროტად და ის უნდა გამოვიყენოთ სწორად. ჩემი მეგობრები საქართველოდან ბევრს აკეთებენ, რომ მოხდეს იმპლემენტაცია. არის საკითხები, რომლებიც სამომავლოდ სამსჯელოა, თუმცა ახლა პოლიტიკურმა სიტუაციამ პოზიტიური გადაწყვეტილებისკენ უნდა გვიბიძგოს. ჩემთვის ძალიან მარტივია კითხვა და პასუხი, ჩემმა ქვეყანამ ბევრი მიიღო ევროკავშირისგან და ამიტომ ამ პროცესით მომლოდინე ქვეყნებმაც უნდა ისარგებლონ", - განაცხადა  ნაუსედამ.

შეგახსენებთ, 8 ნოემბერს, ევროკომისიამ გაფართოების შესახებ ანგარიში გამოაქვეყნა, სადაც აღნიშნულია, რომ ევროკომისია ევროპულ საბჭოს მიმართავს რეკომენდაციით, საქართველოს ევროკავშირის კანდიდატი ქვეყნის სტატუსი მიენიჭოს.

ევროკომისიამ საქართველოსთვის კანდიდატის სტატუსის მინიჭების რეკომენდაცია 9 დათქმით გასცა:

• ევროკავშირისა და მისი ღირებულებების წინააღმდეგ დეზინფორმაციასთან და უცხოურ საინფორმაციო მანიპულაციასა და ჩარევასთან ბრძოლა;
• ევროკავშირის საერთო საგარეო უსაფრთხოების პოლიტიკასთან საქართველოს შესაბამისობის გაუმჯობესება;
• პოლიტიკური პოლარიზაციის საკითხის შემდგომი განხილვა, მათ შორის, პარლამენტში ოპოზიციურ პარტიებთან ერთად საკანონმდებლო მუშაობა უფრო ინკლუზიური გზით, განსაკუთრებით, საქართველოს ევროინტეგრაციასთან დაკავშირებულ კანონმდებლობაზე;
• თავისუფალი, სამართლიანი და კონკურენტული საარჩევნო პროცესის უზრუნველყოფა, განსაკუთრებით 2024 წელს და ეუთო/ოდირის რეკომენდაციების გათვალისწინება. საარჩევნო რეფორმის დასრულება, მათ შორის, არჩევნებამდე მუშაობის დაწყება ელექტორატის ადეკვატური წარმომადგენლობის უზრუნველსაყოფად;
• საპარლამენტო კონტროლის დანერგვის გაუმჯობესება, განსაკუთრებით უსაფრთხოების სამსახურებზე. ინსტიტუციური დამოუკიდებლობის, განსაკუთრებით საარჩევნო ადმინისტრაციის, ეროვნული ბანკის და კომუნიკაციების კომისიის მიუკერძოებლობის უზრუნველყოფა;
• ჰოლისტური და ეფექტიანი სასამართლო რეფორმის დანერგვა და დასრულება. მათ შორის, იუსტიციის უმაღლესი საბჭოსა და პროკურატურის სამსახურის სრულფასოვანი რეფორმის განხორციელება, ვენეციის კომისიის რეკომენდაციების სრულად გათვალისწინებით და გამჭვირვალე და ინკლუზიური პროცესით;
• ანტიკორუფციული ბიუროს, სპეციალური საგამოძიებო სამსახურისა და პერსონალურ მონაცემთა დაცვის სამსახურის ეფექტურობისა, ინსტიტუციური დამოუკიდებლობისა და მიუკერძოებლობის უზრუნველყოფა. ამ ორგანოებთან დაკავშირებით ვენეციის კომისიის რეკომენდაციების გათვალისწინება ინკლუზიურ პროცესით. კორუფციისა და ორგანიზებული დანაშაულის საქმეების ეფექტური გამოძიების ძლიერი გამოცდილების დაგროვება;
• მიმდინარე სამოქმედო გეგმის გაუმჯობესება დეოლიგარქიზაციასთან დაკავშირებით, რათა დეოლიგარქიზაცია განხორციელდეს მრავალსექტორული, სისტემური მიდგომით, ვენეციის კომისიის რეკომენდაციების შესაბამისად, გამჭვირვალე და ინკლუზიური პროცესის შედეგად, ოპოზიციური პარტიებისა და სამოქალაქო საზოგადოების ჩართულობით;
• ადამიანის უფლებების დაცვის გაუმჯობესება, მათ შორის, ადამიანის უფლებების ამბიციური სტრატეგიის განხორციელებით, ასევე შეკრებისა და გამოხატვის თავისუფლების უზრუნველყოფით. დაიწყოს მიუკერძოებელი, ეფექტური და დროული გამოძიებები მოწყვლადი ჯგუფების, მედია-პროფესიონალებისა და სამოქალაქო საზოგადოების აქტივისტების მიმართ საფრთხისშემცველ შემთხვევებზე და ძალადობის ორგანიზატორებისა და დამნაშავეების პასუხისგებაში მიცემა. სამოქალაქო საზოგადოებასთან კონსულტაციების გამართვა, კანონშემოქმედებით და პოლიტიკის შემუშავების პროცესში მათი ჩართულობისა და თავისუფლად მოქმედების უზრუნველყოფა.

ამასთან, გუშინ, 13 დეკემბერს ევროპარლამენტმა დაამტკიცა რეზოლუცია, რომელიც მხარს უჭერს საქართველოს კანდიდატის სტატუსს და ევროკავშირში გაწევრიანების მოლაპარაკებების დაწყებას უკრაინის, მოლდოვასა და ბოსნია და ჰერცეგოვინისთვის. 

ავტორი: ექსპრესნიუსი,

სოციალური ქსელები

მოსკოვის მერის თქმით, რუსეთის დედაქალაქზე დრონებით იერიში მიიტანეს

რუტემ სამხედრო შესყიდვებისთვის ნატოს „ერთიანი ფანჯრის“ შექმნის შესახებ განაცხადა

„ბლუმბერგი“: ევროპა არ ელის, რომ ტრამპი რუსეთის წინააღმდეგ ახალ სანქციებს დააწესებს ან უკრაინას დახმარებას გაუწევს

დამასკოში, ტურიზმის სამინისტროსთან ორი აფეთქების შედეგად 18 ადამიანი დაშავდა, მათ შორის ოთხი პოლიციელია