2021-08-19 12:35:51, 721 ნახვა

---

ლევან დავითაშვილი - ჩვენი გეგმის ნაწილია გავასამმაგოთ მოსავალი იმისათვის, რომ სამჯერ მეტი იყოს შემოსავალი თითოეული თქვენგანის ოჯახში

„მინდა მადლობა გადაგიხადოთ, იმ მხარდაჭერისთვის, რასაც წლების განმავლობაში გვიცხადებდით. ჩვენ გვჭირდება მეტი შემოსავალი თითოეული თქვენგანის ოჯახში იმისთვის, რომ ჩვენი ქვეყანა, თითოეული მხარე, თითოეული მუნიციპალიტეტი იყოს უფრო წარმატებული და ეს წარმატება გვინდა მოვიტანოთ თქვენთან ერთად, ერთობლივი შრომით", - განაცხადა გარემოს დაცვისა და სოფლის მეურნეობის მინისტრმა, ლევან დავითაშვილმა ,,ქართული ოცნების" ლანჩხუთის მერობის კანდიდატის, ალექსანდრე სარიშვილის წარდგენაზე.

როგორც მინისტრმა აღნიშნა, გურიაში, მოსახლეობის, დაახლოებით, 50% სოფლის მეურნეობაშია ჩართული. შესაბამისად, გარემოს დაცვისა და სოფლის მეურნეობის სამინისტროსთვის ამ რეგიონში შედეგების ჩვენება არის უმნიშვნელოვანესი მანიშნებელი, რამდენად წარმატებულია დარგის ხელშეწყობის პოლიტიკა. 

„ჩვენი პოლიტიკა გულისხმობს თქვენი ინიციატივების მხარდაჭერას, მეტი რესურსი გავაჩინოთ იმისათვის, რომ შეძლოთ თქვენი შესაძლებლობების მაქსიმალურად რეალიზება. გურია გამორჩეულად მცირემიწიანია. შესაბამისად, ალბათ უფრო მეტი შემოქმედებითობა, უფრო მეტი ორიგინალური მიდგომები, უფრო მეტი ტექნოლოგიები და ინვესტირება გვჭირდება იმისათვის, რომ 1 ჰა მიწაზე უფრო მეტი პროდუქტიულობა, მეტი ღირებულება შევქმნათ და ამას აკეთებდა გურია; ქმნიდა განსაკუთრებით მაღალი ღირებულებებს კულტურის წარმოებაში, სუბტროპიკული კულტურების წარმოებაში და დღეს გვაქვს შანსი, რომ გამორჩეული კულტურებით შევქმნათ დოვლათი ამ მხარეში", - განაცხადა ლევან დავითაშვილმა.

მინისტრმა რეგიონში აზიური ფაროსანას გავრცელების შედეგებზე ისაუბრა და აღნიშნა, რომ ეს იყო გამოწვევა, რომელსაც ძალიან ბევრი განვითარებული ქვეყანა 10 წელი და მეტი ებრძოდა იმისთვის, რომ მოეხდინა პოპულაციის რეგულირება და გადაერჩინა მოსავალი.

„ჩვენ შევძელით, უმოკლეს დროში, 3-4 წელიწადში ამ პრობლემის მოგვარება; შევძელით ძირითადი სასოფლო-სამეურნეო კულტურების გადარჩენა. ეს გამოწვევა არ დამთავრებულა და მომავალ წლებშიც მოგვიწევს ამ მიმართულებით მუშაობა. ჩვენ მოვახდინეთ ადგილობრივი მოსახლეობის ჯგუფების გაძლიერება თხილის მწარმოებელ ასოციაციასთან ერთად. ფაქტობრივად, თითოეულ ოჯახში მივიტანეთ ცოდნა, მივიტანეთ კონკრეტული სამოქმედო გეგმა, თუ როგორ შეიძლება მოსავლის გადარჩენა და მეტი შემოსავლის მიღება; თუმცა, დღეს მაინც შორს ვართ იმ ამოცანებისგან, რაც ჩვენ გვაქვს. დღეს ჩვენ ვიღებთ დაახლოებთ 1 ტ მოსავალს 1 ჰა-ზე, რაც შეიძლება გასამმაგდეს. ეს არის ჩვენი გეგმის ნაწილი - მინიმუმ გავასამმაგოთ მოსავალი იმისათვის, რომ სამჯერ მეტი იყოს შემოსავალი თითოეული თქვენგანის ოჯახში", -განაცხადა ლევან დავითაშვილმა.

როგორც მინისტრმა აღნიშნა, ENPARD-ს შემდეგი ფაზა, რომელიც სექტემბრიდან დაიწყება და 4 წლის განმავლობაში გაგრძელდება, გურიის საჭიროებებს ითვალისწინებს, რაც გააჩენეს საშუალებას მეტი მხარდაჭერა ჰქონდეს ადგილობრივ ინიციატივებს.

---

ავტორი: NS (სტატია დაფინანსებულია),

---

დღის თემა

მთავარი თემა

ინტერვიუ - ექსკლუზივი