2021-05-28 15:32:14, 527 ნახვა

---

ირაკლი ნადარეიშვილი: სახელმწიფოს ხელშეწყობით განვითარებული სტარტაპების მიერ მილიონობით ლარის პირდაპირი უცხოური ინვესტიციაა მოზიდული

„საქართველოს მთავრობის პრიორიტეტს წარმოადგენს ცოდნასა და ტექნოლოგიებზე დაფუძნებული ეკონომიკის განვითარება და ბოლო წლების განმავლობაში ძალიან აქტიურად მონაწილეობს სახელმწიფო ინოვაციური ეკოსისტემის ჩამოყალიბებასა და ხელშეწყობაში. ეკონომიკის სამინისტროს ინოვაციებისა და ტექნოლოგიების სააგენტოში დღეს თავმოყრილია როგორც ფინანსებზე ხელმისაწვდომობის, ასევე ტექნიკური დახმარების, აქსელერაციის, მენტორშიპის მთელი რიგი ინსტრუმენტები, რაც ხელს უწყობს სტარტაპების განვითარებას" - ამის შესახებ ეკონომიკის მინისტრის მოადგილემ, ირაკლი ნადარეიშვილმა გლობალური სტარტაპ ფონდის რიგით მე-3 ღონისძიებაზე განაცხადა, სადაც ინვესტორების მიერ შერჩეულმა 16-მა სტარტაპმა პრეზენტაციები გამართა საერთაშორისო ინვესტორებისგან  დაფინანსების მოსაპოვებლად.

მინისტრის მოადგილის შეფასებით, ძალიან მნიშვნელოვანია ინვესტორების მონაწილეობა და მათი დაინტერესება ეკოსისტემის განვითარებაში და ამ მხრივ,  ბოლო ორი წელი იყო განსაკუთრებით წარმატებული.

„გასულ წელს, პანდემიის პერიოდში, ქვეყანაში შემოვიდა მსოფლიო დონის აქსელერატორი კომპანია, რომელსაც მოჰყვა, ერთი მხრივ, „საქართველოს ბანკის" მილიონდოლარიანი საინვესტიციო პაკეტი სტარტაპ-ეკოსისტემაში, ასევე მთელი რიგი კომპანიების მიერ საერთაშორისო ინვესტორებთან ხელშეკრულებების გაფორმება, მათ შორის სილიკონის ველზე, ამერიკაში. დღეს, შეგვიძლია ვთქვათ, რომ სახელმწიფოს მხრიდან პირდაპირი პროგრამების თვალსაზრისით ინვესტირებულია დაახლოებით 11 მილიონი ლარი ეკოსისტემის განვითარებაში, ხოლო სტარტაპების მიერ მილიონობით ლარის ოდენობის  პირდაპირი უცხოური ინვესტიციაა მოზიდული" - აღნიშნა ირაკლი ნადარეიშვილმა.

გლობალური სტარტაპ-ფონდი არის პირველი საერთაშორისო სტარტაპ-ფონდი საქართველოში, რომელიც ისრაელის სილიკონ ვადის ინვესტორებისა და საქართველოს ეკონომიკისა და მდგრადი განვითარების სამინისტროს ინოვაციების და ტექნოლოგიების სააგენტოს მხარდაჭერით BTU-ში დაფუძნდა. ფონდში პირველი მსხვილი დაფინანსება GITA-სთან პარტნიორობით, 1 300 000 ლარის ოდენობით, სტარტაპ Echolize-ში 2019 წელს განახორციელა. 2021 წლიდან MIT-ს სამეწარმეო ცენტრში გაწევრიანების შემდეგ, BTU-ს სტარტაპ ფონდის ყველა პარტნიორ კომპანიას, სტარტაპს და ინვესტორს გაეხსნა წვდომა Martin Trust Center-ის საერთაშორისო ქსელთან, რომელიც ერთ-ერთი უმსხვილესი სტარტაპ ეკოსისტემაა მსოფლიოში.

---

ავტორი: NS (სტატია დაფინანსებულია),

---

დღის თემა

მთავარი თემა

ინტერვიუ - ექსკლუზივი