„სააკაშვილის წასვლის შემდეგ, საქართველოს, აფხაზეთისა და სამხრეთ ოსეთის სამართალდამცავები ერთმანეთთან  კარგად თანამშრომლობენ“, - ამის შესახებ რუსეთის საგარეო საქმეთა მინისტრის მოადგილემ გრიგორი კარასინმა, რუსეთის ფედერაციასა და ოკუპირებულ აფხაზეთს შორის გაფორმებული ე.წ. შეთანხმების რატიფიცირების შემდეგ განაცხადა.

კარასინის თქმით, ატმოსფერო გაცილებით უფრო ჯანსაღია მას შემდეგ, რაც სააკაშვილი პრეზიდენტის პოსტიდან წავიდა.

"უნდა ითქვას, რომ ბოლო ორი წლის განმავლობაში საზღვრებზე შედარებითი სიმშვიდეა. საქართველოს, სამხრეთ ოსეთის, აფხაზეთის სამართალდამცავი უწყებების წარმომადგენლები და რუსი მესაზღვრეები ერთმანეთთან თანამშრომლობენ. ატმოსფერო გაცილებით უფრო ჯანსაღია მას შემდეგ, რაც ბატონი სააკაშვილი საქართველოს პრეზიდენტის პოსტიდან წავიდა“, - განაცხადა კარასინმა.

ამასთან, კარასინმა აღნიშნა, რომ  2014 წლის 24 ნოემბერს გაფორმებული ე.წ. ხელშეკრულება  იმ ისტორიული ხელშეკრულების განვითარებაა, რომელსაც ხელი 2008 წლის  ტრაგიკული მოვლენების შემდეგ მოეწერა.

"უკვე არაერთხელ ითქვა, რომ 24 ნოემბერს გაფორმებული შეთანხმება იმ ისტორიული ხელშეკრულებების განვითარებაა, რომელსაც ხელი მოეწერა 2008 წლის ტრაგიკული მოვლენების შემდეგ. შეიქმნა ახალი რეალობა, რომელიც, თავისთავად, საქართველოს წინა ხელისუფლებამ მწვავედ აღიქვა და დღემდე საქართველოს შიდა და საგარეო პოლიტიკის მტკივნეულ წერტილს წარმოადგენს“, - განაცხადა კარასინმა.

შეგახსენებთ, რომ ოკუპირებული აფხაზეთის დე-ფაქტო პრეზიდენტმა რაულ ხაჯიმბამ და რუსეთის ფედერაციის პრეზიდენტმა ვლადიმერ  პუტინმა ე.წ. მოკავშირეობისა და სტრატეგიული თანამშრომლობის ხელშეკრულებას ხელი 2014 წლის 24 ნოემბერს მოაწერეს.

ავტორი: ირაკლი მანაგაძე , ექსპრესნიუსის რეპორტიორი 2009 წლიდან

სოციალური ქსელები

რუმინეთის პატრიარქი დანიელი - გისურვებთ თქვენს უნეტარესობას მრავალ კურთხეულ წელს საქართველოს მართლმადიდებელი ხალხის სამსახურში

ალბანეთის წინამძღვარი - ილია II-ის ტახტზე ასვლა, თქვენს უნეტარესობას წმინდა და მძიმე მემკვიდრეობას ანდობს

აშშ-ის საელჩო: ვულოცავთ შიო III-ს პატრიარქად არჩევას, ისტორიული მოვლენაა, დამოუკიდებლობის აღდგენის შემდეგ პატრიარქის პირველი არჩევაა

CNN: ტრამპი იმედგაცრუებულია ირანთან მოლაპარაკებებით და ომის განახლებისთვის ემზადება