2018-11-19 11:58:35, 1354 ნახვა

---

რასმუსენი - ნატო-მ არასწორი სიგნალი გაუგზავნა პუტინს, როდესაც 2008 წლის სამიტზე საქართველოსა და უკრაინას MAP-ი არ მისცა

ჩრდილოატლანტიკური ალიანსის ყოფილი გენერალური მდივანი, ანდერს ფოგ რასმუსენი მიიჩნევს, რომ საქართველოსა და უკრაინისთვის ნატო-ში გაწევრიანების სამოქმედო გეგმა (MAP-ი) 2008 წლის ბუქარესტის სამიტზე უნდა მიეცათ.

როგორც მან „ომისა და მშვიდობის ინსტიტუტისთვის“ მიცემულ ინტერვიუში აღნიშნა, ალიანსმა ამ თავშეკავებით რუსეთს არასწორი სიგნალი გაუგზავნა.

„ვფიქრობ, ჩვენ სწორი ნაბიჯები გადავდგით. კომუნიზმის დაშლისა და ბერლინის კედლის დაცემის შემდეგ, ჩვენ გამოვიყენეთ შესაძლებლობა, რომ აღმოსავლეთ პარტნიორები ევროკავშირსა და ნატო-ში გაგვეწევრიანებინა; ეს სწორი გადაწყვეტილება იყო და ჩვენ გავაფართოვეთ ნატო და ევროკავშირი. ამის შემდეგ, 2008 წლის ბუქარესტის სამიტზე ჩვენ გადავწყვიტეთ, რომ საქართველო და უკრაინა გახდებოდნენ ნატო-ს წევრები. ვფიქრობ, ესეც იყო სწორი გადაწყვეტილება. პირადად მე ვიყავი მომხრე, რომ საქართველოსთვის და უკრაინისთვის მაშინვე მიგვეცა სამოქმედო გეგმა (MAP). ვფიქრობ, იმის გამო რომ ეს არ გავაკეთეთ, ამით პუტინს არასწორი სიგნალი გავუგზავნეთ. მან ჩათვალა, რომ აგრესიული მოქმედება შეეძლო და ეს იმავე წელს გააკეთა - თავს დაესხა საქართველოს. ასე რომ, დღევანდელი გადმოსახედიდან ვფიქრობ, ბოლომდე უნდა მივყოლოდით გზას, რომელიც საქართველოსა და უკრაინას MAP-ის მიღებამდე მიიყვანდა. ეს არ იქნებოდა ალიანსში გაწევრიანების გარანტია, მაგრამ იქნებოდა ძლიერი სიგნალი“, - განაცხადა ანდერს ფოგ რასმუსენმა.

---

ავტორი: ,

---

დღის თემა

მთავარი თემა

ინტერვიუ - ექსკლუზივი