საქართველოს პრეზიდენტმა გიორგი მარგველაშვილმა ესტონელ კოლეგას და ხალხს საქართველოს მხარდაჭერისთვის მადლობა გადაუხადა.

მარგველაშვილმა ესტონელ კოლეგასთან შეხვედრის შემდეგ გამართულ ერთობლივ პრესკონფერენციაზე აღნიშნა, რომ წლების განმავლობაში საქართველო ესტონეთის მხარდაჭერას იღებს.

"საქართველოში ბატონი ტოომას ჰენდრიკ ილვესის ბოლო ვიზიტი 2008 წელს შედგა, იმ მომენტში, როდესაც ჩვენ ყველაზე მეტად გვიჭირდა და ის იდგა ჩვენ გვერდით. ამიტომ პირადად მინდა ჩვენს მეგობარს მადლობა გადავუხადო ამ მხარდაჭერისთვის. მინდა მადლობა ვუთხრა მთელ ესტონელ ხალხს, რადგან წლების განმავლობაში ვიღებთ იმ მხარდაჭერას ჩვენი ესტონელი პარტნიორებისგან, რომელიც გვჭირდება სერიოზული გეგმების მისაღწევად. ეს ეხება, როგორც ჩვენს ევროინტეგრაციულ პროცესებს, ისე ევროატლანტიკურ დღის წესრიგს", - განაცხადა გიორგი მარგველაშვილმა.

საქართველოს პრეზიდენტმა იმედი გამოთქვა, რომ ესტონეთის პირველი პირის ვიზიტი კიდევ უფრო ახალ იმპულსს მისცემს იმ ინტენსიურ თანამშრომლობას, რომელიც ორ ქვეყანას შორის არსებობს.

"იმედი მაქვს, რომ ეს ვიზიტი ჩვენს ურთიერთობებს, რომლებიც ვითარდება, ფაქტობრივად, ყველა სფეროში, მისცემს კიდევ უფრო ახალ, დინამიურ განვითარებას", - აღნიშნა მარგველაშვილმა. ამასთან, მან მარგველაშვილმა აღნიშნა, რომ ესტონეთი არა მარტო პოლიტიკურად - ევროკავშირის და ნატოს პოლიტიკურ ფორუმების ფარგლებში, არამედ "პიროვნულადაც" ეხმარება საქართველოს. "ის გზა, რომელიც ესტონეთმა საბჭოთა კავშირის მეკავშირე რესპუბლიკიდან ევროკავშირის და ნატოს წევრ ქვეყანამდე განვლო, ჩვენთვის უმნიშვნელოვანესია. ჩვენ დეტალურად ვსწავლობთ ამ გზას და წარმატებას, რასაც ჩვენმა მეგობარმა ქვეყანამ მიაღწია. შეხვედრაზე განვიხილეთ საქართველოში, ასევე რეგიონში არსებული ვითარება და ის გამოწვევები, რომლებიც დგას არა მარტო აღმოსავლეთ პარტნიორობის ქვეყნების, არამედ, ფაქტობრივად, მთელი ევროპული უსაფრთხოების წინაშე", - განაცხადა გიორგი მარგველაშვილმა.

ავტორი: ირაკლი მანაგაძე , ექსპრესნიუსის რეპორტიორი 2009 წლიდან

სოციალური ქსელები

საია - გავრცელებული შემაშფოთებელი კადრები სისტემური და სისტემატური საპოლიციო ძალადობის კიდევ ერთ ილუსტრაციას წარმოადგენს, რომელიც წლების განმავლობაში ავტორიტარული რეჟიმის ხელწერად იქცა

პირმა წარსულში არსებული დავის ნიადაგზე 2 კაცი მოკლა

ახმეტაში, შვილის გადარჩენის მცდელობისას მამაკაცი ტბაში დაიხრჩო

ბრიტანეთმა რუსული „ჩრდილოვანი ფლოტის“ ტანკერი დააკავა