თბილისში სუამი-ს დაფუძნების 20 წლისთავი აღინიშნება

2017-10-08 10:44:34, 2129 ნახვა

პოლიტიკა

თბილისში, დღეს, დემოკრატიისა და ეკონომიკური განვითარების ორგანიზაციის - სუამის საგარეო საქმეთა მინისტრთა საბჭოს სპეციალური სხდომა იმართება.

სხდომა სუამის დაფუძნებიდან მე-20 წლისთავს ეძღვნება. ამ საიუბილეო თარიღის აღსანიშნავად, გენერალური მდივნის ალთაი ეფენდიევის ხელმძღვანელობით, თბილისს სუამის მაღალი დონის დელეგაცია ეწვია, რომელსაც საქართველოს ვიცე-პრემიერი, საგარეო საქმეთა მინისტრი მიხეილ ჯანელიძე მასპინძლობს.

დელეგაციის შემადგენლობაში არიან ზერბაიჯანის რესპუბლიკის საგარეო საქმეთა მინისტრი ელმარ მამედიაროვი, მოლდოვას რესპუბლიკის ვიცე-პრემიერი, საგარეო საქმეთა და ევროინტეგრაციის მინისტრი ანდრეი გალბური და უკრაინის საგარეო საქმეთა მინისტრი პავლო კლიმკინი.

სპეციალური სხდომის ფარგლებში, ხელი მოეწერება სუამის საგარეო საქმეთა მინისტრთა ერთობლივ კომუნიკეს. სხდომის დასასრულს იგეგმება ერთობლივი პრეს-კონფერენციის გამართვა, სადაც განცხადებებს გააკეთებენ ორგანიზაციის ოთხივე წევრი ქვეყნის საგარეო საქმეთა მინისტრები.

ვიზიტის ფარგლებში, სუამ-ის საგარეო საქმეთა მინისტრთა საბჭოს წევრები საქართველოს პრეზიდენტს გიორგი მარგველაშვილსა და პრემიერ მინისტრს გიორგი კვირიკაშვილს შეხვდებიან.

დღის ბოლოს, სუამის დელეგაციის წევრები „თბილისობის" დღესასწაულშიც მიიღებენ მონაწილეობას.

აღსანიშნავია, რომ 2017 წელს საქართველო სუამის თავმჯდომარე ქვეყანაა. საქართველოს თავმჯდომარეობის პრიორიტეტი საქართველოს, უკრაინას, აზერბაიჯანსა და მოლდოვას შორის დინამიური და პროდუქტიული თანამშრომლობის უზრუნველყოფაა.