ეუთო-ს სადამკვირვებლო მისია: არჩევნების დროს ადგილი ჰქონდა ძალადობის ცალკეულ შემთხვევებს

2016-10-09 16:11:20, 739 ნახვა

პოლიტიკა

არჩევნების დროს ადგილი ჰქონდა ძალადობის ცალკეულ შემთხვევებს, რამაც გარკვეული ზეგავლენა მოახდინა, თუმცა რისკის ქვეშ არ დაუყენებია არჩევნები, რომელიც სხვა მხრივ ძალიან დადებითი იყო, - ამის შესახებ ეუთო-ს მოკლევადიანი სადამკვირვებლო მისიის კოორდინატორმა იგნასიო სანჩეს ამორმა არჩევნების შესახებ ევროკავშირი, ნატო-სა და ეუთო-ს ერთობლივი ანგარიშის წარდგენისას განაცხადა.

მისი თქმით, არჩევნები ძალიან კონკურენტულ და კარგად ორგანიზებულ გარემოში გაიმართა, რამაც საშუალება მისცა ამომრჩევლებს ინფორმირებული გადაწყვეტილებები მიეღოთ პოლარიზებულ მედიაგარემოში.

„არჩევნებთან დაკავშირებით ბევრი ელემენტი იყო და მინდა რამდენიმე ასპექტს ხაზი გავუსვა. ყურადღება მიაქციეთ, რომ ეს ყველაფერი ეფუძნება გრძევადიანი სადამკვირვებლო მისიის მუშაობას, რომელიც აქ იმყოფებოდა ერთი თვის განმავლობაში. მათ მხარს უჭერდა 324 დამკვირვებელი 34 ქვეყნიდან, რომლებიც გუშინ მთელი ქვეყნის მასშტაბით იყვნენ მივლენილნი. საბოლოო ჯამში არჩევნები იყო კონკურენტული, ძალიან კარგად ორგანიზებულ გარემოში მიმდინარეობდა, დაცული იყო ძირითადი თავისუფლებები. თუმცა, მშვიდი და ღია ატმოსფერო მაინც მოექცა გავლენის ქვეშ, რაც გამოწვეული იყო უკანონო კამპანიის წარმოებით და ძალადობის კონკრეტული შემთხვევებით. საარჩევნო ადმინისტრაცია და ამომრჩეველთა სია ნდობას იმსახურებდა”, - აღნიშნა ეუთო-ს მოკლევადიანი სადამკვირვებლო მისიის კოორდინატორმა.

ამასთანავე, ეუთო-ს მოკლევადიანი სადამკვირვებლო მისიის კოორდინატორის აზრით, მედია პლურალისტული იყო.

“კენჭისყრა საკმაოდ მოწესრიგებულად გაიმართა, თუმცა ხმების დათვლა ცოტა უფრო ნეგატიურად შეფასდა კონკრეტული პროცედურული პრობლემების გამო. საარჩევნო ადმინისტრაცია, რომელსაც უძღვებოდა ცესკო, დროული და პროფესიონალური მეთოდებით მუშაობდა. ცესკო-მ მართლაც ნდობა დაიმსახურა. მინდა, რომ ცესკო-ს მივულოცო, რადგან მან დიდი ძალისხმევა გაწია, რომ ეს არჩევნები ასე შემდარიყო. მე ვარ პოლიტიკოსი ჩემს ქვეყანაში -ესპანეთში და ძალიან ვაფასებ იმას, თუ რამდენად ესეთი არჩევნები, როდესაც არის კონკურენტული გარემო. აღვნიშნავთ, რომ არჩევნები საქართველოში იყო საკმაოდ მშვიდი, მიუხედავად ცალკეული კონკრეტული შემთხვევებისა”, - აცხადებს იგნასიო სანჩეს ამორი.

იგნასიო სანჩეს ამორმა საბოლოო დასკვნების გაკეთებისაგან თავი შეიკავა.

„რაც შეეხება კენჭისყრის დღეს, ზოგადად ის მოწესრიგებულად გაიმართა, თუმცა გარკვეული დაძაბულობა დღის განმავლობაში გაიზარდა და მოხდა რამდენიმე ძალადობრივი დაპირისპირება უშუალოდ საარჩევნო უბნებზე და უბნებს გარეთ. რამდენიმე საარჩევნო უბანზე პროცესი ჩვენი დამკვირვებლების მეირ უარყოფითად შეფასდა იმის გამო, რომ კომისიის მუშაობაში არაუფლებამოსილი პირები ჩაერივნენ. რაც შეეხება ხმების დათვლას, ძირითადად აქ პრობლემები პროცედურული საკითხების დაუცველობით იყო გამოწვეული. რაც შეეხება ჩვენს ძირითად მიგნებებს, ეს ყველაფერი ასახული იქნება ჩვენს ანგარიშში. საბოლოო დასკვნამდე მინდა თავი შევიკავოთ. რაც ეხება სხვა საკითხებს, თუ იქნება გაყალბების მტკიცებულება, ეს გამოძიებას დაექვემდებარება და რასაკვირველია ამის შესაბამისი ზომები იქნება მიღებული. ჩვენ მოველით, რომ არჩევნების შემდეგ გაიმართება მეორე ტური და კვლავ გაიმართება აქტიური კამპანია. ველით, რომ არ მოხდება ისეთი რამ, რაც რისკის ქვეშ დააყენებს ამ პროცესს”, - განაცხადა იგნასიო სანჩეს ამორმა.