თბილისის მერმა დავით ნარმანიამ, საბავშვო ბაგა-ბაღების მართვის სააგენტოს ხელმძღვანელ თემურ თორდინავასთან და საკრებულოს თავმჯდომარე გიორგი ალიბეგაშვილთან ერთად,  ზემო ფონიჭალაში მდებარე №206 საბავშვო ბაღი   გახსნა.

თბილისის მერიის ინფორმაციით, დავით ნარმანიამ, მოწვეულ სტუმრებთან ერთად, საბავშვო ბაღი დაათვალიერა, რის შემდეგაც ბაღის ეზოში შეკრებილ მოსახლეობას სიტყვით მიმართა.

ნარმანიას  განცხადებით, განახლებული საბავშვო ბაღი, 260 აღსაზრდელს, უკვე ხვალიდან მიიღებს.

„ზემო ფონიჭალაში საბავშვო ბაღის გახსნა ჩვენი წინასაარჩევნო დაპირება გახლდათ, რადგან ამ უბანში არცერთი საბავშვო ბაღი არ იყო. ბაღში პატარებს ექნებათ ყველანაირი პირობა იმისთვის, რომ ღირსეულად  აღიზარდონ.  ჩვენ კვლავ ვაგრძელებთ  ინტენსიურ რეჟიმში ახალი საბავშვო ბაღების მშენებლობას“ - განაცხადა დავით ნარმანიამ.  

აღნიშნულ ბაღში ბავშვების რეგისტრაცია 16 მაისს გამოცხადდა. ამ დროისთვის, 2-3 წლიანთა ჯგუფის (ბაგა) გარდა, ბაღში რამდენიმე თავისუფალი ადგილია დარჩენილი.   მსურველებს რეგისტრაციის გავლა თბილისის ბაგა-ბაღების მართვის სააგენტოს ვებ-გვერდზე www.kids.org.ge შეუძლიათ.

№206 საბავშვო ბაღი 260 ბავშვზეა გათვლილი. ბაღში   8 სააღმზრდელო ჯგუფია, მათ შორის, ორი ბაგა.  მასში 60-ზე მეტი ადამიანი დასაქმდება.

№206 საბავშვო ბაგა-ბაღი ერთ-ერთია იმ მრავალრიცხოვანი ბაღებიდან, რომლებიც გასულ წლებში დაიხურა. მიუხედავად იმისა, რომ აღნიშნული სააღმზრდელო დაწესებულება კეთილმოწყობილი იყო, 2006 წელს ფუნქციონირება შეწყვიტა. აღსაზრდელები და პერსონალი №209 ბაგა-ბაღში გადავიდა. მოგვიანებით, შენობა გაიძარცვა და  ავარიული გახდა.

მოსახლეობის მხრიდან გაზრდილი მოთხოვნის გათვალისწინებით, ბაღის აღდგენითი და სარემონტო სამუშაოები 2014 წლის ბოლოს დაიწყო და შენობა თანამედროვე სტანდარტებით მოეწყო.

გარდა აღნიშნული ბაღისა, მიმდინარე თვეში, თბილისში კიდევ ერთმა ახალმა -  № 35 ბაღმა დაიწყო ფუნქციონირება. ამასთან, წელს დედაქალაქში დამატებით 4 ახალი  ბაღის გახსნა იგეგმება.

ღონისძიებას კრწანისის რაიონის გამგებელი  გიორგი კოპალეიშვილი, პარლამენტარი შოთა ხაბარელი და თბილისის საკრებულოს წარმომადგენლები ესწრებოდნენ. 

ავტორი: ირაკლი მანაგაძე , ექსპრესნიუსის რეპორტიორი 2009 წლიდან

სოციალური ქსელები

უკრაინის შეიარაღებულმა ძალებმა ვორონეჟში რაკეტსაწინააღმდეგო ნახევარგამტარების ქარხანაზე იერიში მიიტანეს

23-25 ივნისს საქართველოში მოსალოდნელია დროგამოშვებით ნალექიანი ამინდი

Nestle-მ ბრიტანეთის მიერ სანქცირებულ ტელეკომპანია „იმედში“ რეკლამის განთავსების გამო შიდა გამოძიება დაიწყო

ხალხის ფულით ივანიშვილის რეჟიმი 2026 წელს გამოშვებულ 592 ახალ ავტომობილს ₾47 მილიონად ყიდულობს