სოფლის მეურნეობის მინისტრი ოთარ დანელია, კახეთის რეგიონის გუბერნატორი ირაკლი შიოლაშვილი და სოფლის მეურნეობის სამინისტროს შპს „საქართველოს მელიორაციის“ გენერალური დირექტორი ლევან დვალი პანკისის ხეობაში, სოფელ დუისში იმყოფებოდნენ, სადაც აღდგენილი საირიგაციო არხი დაათვალიერეს და ადგილობრივ მოსახლეობას შეხვდნენ.

როგორც „ექსპრესნიუსს“ სოფლის მეურნეობის სამინისტროდან აცნობეს, საირიგაციო სისტემის მოწესრიგების თხოვნით, პანკისის ხეობის მოსახლეობამ სოფლის მეურნეობის მინისტრს 16 მარტს,  სოფელ დუისში გამართულ შეხვედრაზე მიმართეს.

უწყების ინფორმაციით, ოთარ დანელია ადგილობრივებს  პრობლემის  დაჩქარებულ ვადებში მოგვარებას დაჰპირდა. სარყწავი სისტემის მონაკვეთი, რომელზეც  სარეაბილიტაციო  სამუშაოები 30 წელია არ ჩატარებულა,  დღეისათვის უკვე აღდგენილია.   სოფლის მეურნეობის სამინისტროს შპს „საქართველოს მელიორაციის“ მიერ, დუისის ტერიტორიაზე არხის 2 კილომეტრიან მონაკვეთზე სარეაბილიტაციო სამუშაოები განხორციელდა,  მოეწყო სათავე ნაგებობა და სარეგულაციო ფარი.

ჩატარებული სარეაბილიტაციო სამუშაოების შედეგად, მიმდინარე წელს, სარწყავი სეზონისათვის  სოფელ დუისში  70 ჰექტარი მიწის ფართობი  წყალუზრუნველყოფილი იქნება. ხეობაში სამელიორაციო პროექტების განხორციელება  ეტაპობრივად გაგრძელდება.

„ჩვენთვის  პრიორიტეტულია საზღვრისპირა და მაღალმთიანი სოფლების ხელშეწყობა. რამდენიმე დღის წინ,  პანკისის ხეობის მოსახლეობასთან შეხვედრისას სარწყავი წყლის პრობლემა წამოიჭრა, ჩვენ სამუშაოები ჩავატარეთ და დღეს, არხში წყალი უკვე გაეშვა. პანკისის ხეობაში სოფლის მეურნეობის კუთხით ძალიან დიდი რესურსია და შესაძლებელია საინტერესო პროექტების განხორციელება. რაც ყველაზე მნიშვნელოვანია,  დიდი დაინტერესებაა ახალგაზრდების მხრიდან და  ვეცდებით,  მათთვის საინტერესო პროექტები განვახორციელოთ,“ -აღნიშნა ოთარ დანელიამ.

სოფლის მეურნეობის სამინისტროს შპს „საქართველოს მელიორაციამ“ კახეთის რეგიონში 2012 წლიდან დღემდე სამელირაციო ინფრასტრუქტურის 25 სარეაბილიტაციო პროექტი დაასრულა, მათ შორის 3 პროექტი ახმეტის მუნიციპალიტეტში განხორციელდა. ჩატარებული სარეაბილიტაციო სამუშაოების შედეგად,  2012 წლიდან დღემდე წყალუზრუნველყოფილი მიწის ფართობი კახეთის რეგიონში 6 000 ჰექტრიდან  13 600 ჰექტრამდე გაიზარდა.

კახეთის რეგიონში სახელმწიფო რწმუნებულმა-გუბერნატორმა, ირაკლი შიოლაშვილმა მოსახლეობასთან შეხვედრისას აღნიშნა, რომ პანკისის ხეობაში ყოველდღიურად ხორციელდება ინფრასტრუქტურული პროექტები. მიუხდავად ამისა,  საქმე მაინც ბევრია.  სამუშაოები მუდმივად გაგრძელდება  და პანკისის  ხეობა  ერთ-ერთი წარმატებული და განვითარებული კუთხე გახდება.

როგორც პანკისის ხეობის უხუცესთა საბჭოს წევრმა,  ხასო ხანგოშვილმა აღნიშნა, დასაფასებელია, რომ   მინისტრმა  დანაპირები შეასრულა და სარწყავი წყლის პრობლემა მოკლე დროში მოგვიგვარა. აღნიშნული არხი არა მხოლოდ სასოფლო-სამეურნეო სავარგულების მორწყვისთვის გამოიყენება, არამედ 5 წისქვილს აწვდის წყალს. შესაბამისად, ხეობის მოსახლეობისთვის  ორმაგად მნიშვნელოვანი საქმე გაკეთდა.

შეხვედრის ბოლოს პანკისის ხეობის მოსახლეობამ სტუმრების საპატივცემულოდ დოღი გამართა.

ავტორი: ირაკლი მანაგაძე , ექსპრესნიუსის რეპორტიორი 2009 წლიდან

სოციალური ქსელები

დიდმა ბრიტანეთმა, გერმანიამ და ნატოს კიდევ ხუთმა ქვეყანამ უკრაინას ასობით მილიონი დოლარის ღირებულების დრონებისა და რაკეტების ახალი მიწოდება დაჰპირდნენ

ცოლის ინფორმაციით, ბაქოს სააპელაციო სასამართლომ აფგან სადიგოვი პატიმრობაში დატოვა

ურეკში 4 ადამიანი ზღვის დინებამ წაიღო, მაშველებმა 4-ვე გამოიყვანეს, თუმცა 1 დაიღუპა

ALDE: ოცნებამ უნდა უზრუნველყოს, რომ ელენე ხოშტარიამ მიიღოს მკურნალობა, რომელიც სჭირდება