2023-06-20 18:11:16, 947 ნახვა

---

ბაწარა-ბაბანეურის დაცული ტერიტორიების რეინჯერმა, გიორგი აბრამიშვილმა, რეინჯერთა საერთაშორისო ფორუმში „Digital Campfire“ მიიღო მონაწილეობა

„Digital Campfire“ ონლაინ ფორმატში გაიმართა და მასში მონაწილეობა მიიღეს იმ რეინჯერებმა, რომლებსაც სხვადასხვა წელს მოპოვებული აქვთ რეინჯერთა საერთაშორისო ჯილდო. ამის შესახებ ინფრომაციას დაცული ტერიტორიების სააგენტო ავრცელებს.

უწყების ცნობით, „Digital Campfire“ რეინჯერებს მსოფლიოს სხვადასხვა ქვეყნიდან შესაძლებლობას აძლევს თავიანთი უნიკალური ისტორიები და გამოცდილება გაუზიარონ ერთმანეთს.  აღსანიშნავია, რომ ბაწარა-ბაბანეურის დაცული ტერიტორიების რეინჯერი გიორგი აბრამიშვილი 2021 წელს გახდა რეინჯერთა საერთაშორისო ჯილდოს მფლობელი და მსოფლიოს 10 საუკეთესო რეინჯერს შორის დასახელდა. ბუნების დაცვის საერთაშორისო კავშირისა (IUCN) და დაცული ტერიტორიების მსოფლიო კომისიის მიერ დაწესებული "საერთაშორისო რეინჯერთა" კონკურსი მიზნად ისახავს, რეინჯერთა განსაკუთრებული ღვაწლისა და საქმიანობის ხაზგასმას მთელი მსოფლიოს მასშტაბით.

„ვფიქრობ, ჩვენ, სხვადასხვა ქვეყნის რეინჯერებს შეგვიძლია, ერთმანეთს უნიკალური გამოცდილებების გაზიარებებით დავეხმაროთ, ამისთვის კი მნიშვნელოვანია სხვადასხვა პლატფორმის არსებობა, მათ შორის, ერთ-ერთი თქვენი პლატფორმაა, რისთვისაც დიდ მადლობას გიხდით. განსაკუთრებით მაშინ ვგრძნობ უდიდეს ძალას, როდესაც ვაანალიზებ რა კეთილშობილ საქმეს ვემსახურები. ყველაფერი მავიწყდება, როდესაც ვაცნობიერებ იმ მიზანს და მისიას, რომლის გარშემოც გაერთიანებულია დაცული ტერიტორიების სააგენტოს მთელი სისტემა და თითოეული რეინჯერი. ჩემთვის უდიდესი პატივია, დავიცვა საერთაშორისო მნიშვნელობის უნიკალური ტერიტორიები და მომავალ თაობას გადავცე ხელუხლებლად“- აღნიშნა გიორგი აბრამიშვილმა „Digital Campfire“-ზე სიტყვით გამოსვლისას.

გიორგი აბრამიშვილი 20 წელზე მეტია თავდაუზოგავად ემსახურება საქართველოს უნიკალური ბუნების დაცვა-შენარჩუნებას.

---

ავტორი: NS (სტატია დაფინანსებულია),

---

დღის თემა

მთავარი თემა

ინტერვიუ - ექსკლუზივი