2022-11-06 16:05:59, 1299 ნახვა

---

გია ცაგარეიშვილი სახალხო დამცველის არჩევაზე - კონსენსუსი, რა თქმა უნდა, არ იქნება მარტივი, თუმცა ჩვენ ვეცდებით, რომ ოპოზიციის ხმებიც მოვიპოვოთ

პროცესი დასრულდა. 16 კანდიდატთან მოვახერხეთ გასაუბრება. რამდენიმე არ გამოცხადდა, რამდენიმემ მოხსნა კანდიდატურა, მაგრამ ეს სიას არ ცვლის, ცხადია19-ვე იქნება წარმოდგენილი პლენარულ სხდომაზე და უკვე პლენარული სხდომა მიიღებს გადაწყვეტილებას, - ამის შესახებ პარლამენტის უმრავლესობის წევრმა, გია ცაგარეიშვილმა განაცხადა.

როგორც ცაგარეიშვილმა აღნიშნა, უმრავლესობას საკმარისი ხმები არ აქვს და ამიტომ, ისინი ეცდებიან ოპოზიციონერ კოლეგებთან შეთანხმებას სახალხო დამცველის ასარჩევად.

მისი თქმით, ძნელი იქნება ეს პროცესი, თუმცა 20 დეკემბრამდე, უნდა მოხდეს კანდიდატურის შერჩევა.

"თქვენ იცით, რომ არჩევისთვის 90 ხმაა საჭირო. ჩვენ საკმარისი ხმები არ გვაქვს და ამიტომ, ბუნებრივია  კონსულტაციები დაიწყება ოპოზიციონერ კოლეგებთან, სხვადასხვა პარტიებთან, პოლიტიკურ ჯგუფებთან. მაგრამ მანამდე, ჩვენთვის უნდა გადავწყვიტოთ, თუ ვინ არის ჩვენი რჩეული. ჯერ ფრაქციაში დაიწყება კონსულტაციები, აზრთა გაცვლა-გამოცვლა. რა თქმა უნდა, ჩვენ დავეფუძნებით ადამიანის უფლებათა დაცვის კომიტეტის მოსაზრებებს. ამ კომიტეტმა, ძალიან დიდი მოცულობის საქმე გასწია, უკანასკნელი სამი კვირის მანძილზე, 24 საათიან რეჟიმში მომდინარეობდა გასაუბრებები კანდიდატებთან. ამ პროცესმა საკმაოდ რთული გზა გაიარა. კომისიამ შეარჩია ეს 19 კანდიდატი, მანამდე კიდევ ცალკე კონსულტაციები იყო არასამთავრობოებთან. მე ვფიქრობ, ჩვენ ამ თვეში უნდა გვყავდეს ახალი სახალხო დამცველი. 20 დეკემბერს გადის ძველ სახალხო დამცველს ვადა და ჩვენ ვალდებულები ვართ, ავირჩიოთ ახალი სახალხო დამცველი. კონსენსუსი, რა თქმა უნდა, არ იქნება მარტივი, პოლიტიკაში არაფერი მარტივი არ არის, თუმცა, ჩვენ ვეცდებით, რომ გავალღოთ არაწრფელი ადამიანების გულები და მათი ხმებიც მოვიპოვოთ. მე ნაკლებად ვფიქრობ, რომ ნაციონალური მოძრაობის წარმომადგენლებთან საუბარს აზრი აქვს, მაგრამ თქვენ იცით, რომ მათ გარდა არიან კოლეგები ოპოზიციიდან და შესაძლებელი იქნება მათთან კონსულტაციები. რა თქმა უნდა, ნაციონალურ მოძრაობასთანაც გვექნება საუბრები. თუმცა, ხშირ შემთხვევაში, მათთან საუბარი შეუძლებელია", - განცახადა ცაგარეიშვილმა.

---

ავტორი: NS (სტატია დაფინანსებულია),

---

დღის თემა

მთავარი თემა

ინტერვიუ - ექსკლუზივი