ბათუმის საქალაქო სასამართლომ დაადგინა, რომ ქალაქის მერიამ ახალი მეჩეთის აშენებაზე უარის თქმით დისკრიმინაციული გადაწყვეტილება მიიღო, - ამის შესახებ ტოლერანტობის და მრავალფეროვნების ინსტიტუტის მიერ გავრცელებულ ინფორმაციაშია ნათქვამი. 

როგორც ორგანიზაციის განცხადებაშია აღნიშნული, სასამართლოს ამ გადაწყვეტილების მიხედვით, ბათუმის მერიამ ხელახლა უნდა იმსჯელოს ახალი მეჩეთის მშენებლობის ნებართვის საკითხზე.

"ბათუმში ახალი მეჩეთის მშენებლობის ფონდის სასარჩელო მოთხოვნები ნაწილობრივ დაკმაყოფილდა. სასამართლომ დაადგინა დისკრიმინაცია, ბათილად ცნო ბათუმის მერიის გადაწყვეტილება მშენებლობის ნებართვის პირველი სტადიის გაცემაზე უარის შესახებ და საქმე ხელახლა განსახილველად ბათუმის მერიას დაუბრუნა. შესაბამისად, ბათუმის მერიამ ხელახლა უნდა იმსჯელოს ახალი მეჩეთის მშენებლობის ნებართვის საკითხზე. სასამართლომ არ დააკმაყოფილა მოსარჩელე მხარის მოთხოვნა, პირდაპირ დავალებოდა ბათუმის მერიას მშენებლობის ნებართვის პირველი სტადიის დაკმაყოფილების შესახებ აქტის გამოცემა. 

მისასალმებელია, რომ სასამართლომ დისკრიმინაციულად შეაფასა მერიის გადაწყვეტილება. უთანასწორო მოპყრობას საფუძვლად უდევს ფაქტი,  რომ იგივე საცხოვრებელ ზონაში შვიდი მართლმადიდებლური ეკლესიაა აშენებული, მათ შორის რამდენიმე მუნიციპალიტეტის საკუთრებაში არსებულ მიწაზე. მოსამართლემ აღნიშნა, რომ მერიის მიდგომა ორი სხვადასხვა რელიგიური ჯგუფის მიმართ უთანასწოროა. 

ამავდროულად მიგვაჩნია, რომ დისკრიმინაციის დადგენის შემთხვევაში სასამართლოს დავა არსებითად უნდა გადაეწყვიტა, სრულად დაეკმაყოფილებინა მოსარჩელის მოთხოვნა და ბათუმის მერიისთვის პირდაპირ დაევალებინა მშენებლობის ნებართვის პირველი სტადიის დაკმაყოფილების შესახებ ადმინისტრაციულ-სამართლებრივი აქტის გამოცემა.

შეგახსენებთ, რომ სასამართლოში მიმდინარე დავა შეეხება ბათუმში ახალი მეჩეთის მშენებლობის თაობაზე ბათუმის მუნიციპალიტეტის მერიის მიერ ნებართვის გაცემაზე უარის კანონიერებასა და რელიგიის ნიშნით დისკრიმინაციული მოპყრობის დადგენას. სახელმწიფომ არ გაითვალისწინა ბათუმში მცხოვრები მუსლიმი თემის მრავალწლიანი მოთხოვნა და საჭიროება, აეშენებინათ ახალი მეჩეთი. როდესაც ბათუმის მერიამ არ გასცა ბათუმში ახალი მეჩეთის მშენებლობისათვის შესაბამისი ნებართვა, ამით სახელმწიფომ პრაქტიკულად უარი განუცხადა მუსლიმებს, ესარგებლათ რელიგიის თავისუფლებით და სხვა ფუნდამენტური უფლებებით", - ნათქვამია განცხადებაში. 

ავტორი: ლუკა ცარციძე, ექსპრესნიუსის რეპორტიორი 2019 წლიდან

სოციალური ქსელები

მარიამ მეყანწიშვილი - არცერთმა არ აღაირა ის, რაც არ ჩაუდენიათ, თქვენთვის ვიბრძოლებ გარედან

4 ოქტომბრის საქმეზე 3 პირს პატიმრობა მიესაჯა, მეყანწიშვილს ₾5 000-ლარიანი ჯარიმა

ფასდაკლებული პროდუქტის სამთავრობო პორტალი ჩაირთო

გვარაკიძე: კვლავ მკაცრი იყო პროკურატურის პოლიტიკა ოჯახურ დანაშაულზე, ყველას პატიმრობას ვითხოვდით