მაშველებმა ვაკეში, კომპანია „აქსისის“ მშენებარე კორპუსზე თოკით ჩამოკიდებული მამაკაცი ჩამოხსნეს. 

ადგილზე მობილიზებულნი არიან სამაშველო და სასწრაფო დახმარების ბრიგადები.    

შემთხვევასთან დაკავშირებით სამშენებლო კომპანიამ „აქსისი“ განცხადება გაავრცელა.

„ინციდენტი მოხდა დღეს საღამოს „აქსისის“ ერთ-ერთ მშენებარე ობიექტზე. გარეშე პირი, რომელიც ცდილობდა დაცულ ტერიტორიაზე შესვლას, მას შემდეგ, რაც ფიზიკურად დაუპირისპირდა დაცვის წარმომადგენელს, დაუსხლტა მას და მაღალსართულიანი მშენებლობის ზედა ნაწილისკენ გაიქცა.

თვითმხილველთა თქმით, გარეშე პირი იმყოფებოდა ძლიერი თრობის ქვეშ.

ტერიტორიის დაცვის სამსახურის, საპატრულო პოლიციისა და სამაშველო სამსახურის წარმომადგენელთა ერთობლივი ძალისხმევით მოხერხდა მოქალაქის მაღალი სართულის მოაჯირიდან დაშორიშორება და  ჩამოყვანა.

საპატრულო პოლიციის მიერ იგი გადაყვანილი იქნა პოლიციის განყოფილებაში.

მიმდინარეობს ინციდენტის შესაბამისი საგამოძიებო მოქმედებები. კომპანია „აქსისი“ თანამშრომლობს საგამოძიებო უწყებასთან.

ამასთან, უნდა აღინიშნოს, რომ ზოგიერთ მედიასაშუალებაში გავრცელდა სიმართლესთან შეუსაბამო ინფორმაცია, კერძოდ, რომ „აქსისის“ მშენებარე ობიექტიდან კომპანიის მუშა ცდილობდა გადმოხტომას.

ხაზგასმით აღვნიშნავთ, რომ მომხდარ ინციდენტში მონაწილე პირი არასდროს ყოფილა „აქსისის“ არც პირდაპირ დაქირავებული სპეციალისტი და არც ქვეკონტრაქტორი კომპანიების თანამშრომელი.

„აქსისი“ სინანულს გამოთქვამს არასწორი ინფორმაციის გავრცელების გამო და იმედს იტოვებს, რომ წინამდებარე განცხადების გავრცელებისთანავე, მედია მკითხველს, მსმენელს თუ მაყურებელს რეალურ ინფორმაციას მიაწვდის“, - ნათქვამია კომპანიის განცხადებაში.

ავტორი: ირაკლი მანაგაძე , ექსპრესნიუსის რეპორტიორი 2009 წლიდან

სოციალური ქსელები

გორში ტელე-რადიო კომპანია „თრიალეთის“ მხარდამჭერი აქცია გაიმართა

თიბისი სტუმრებს Tbilisi Open Air-ზე განსაკუთრებული შეთავაზებებით უმასპინძლებს

მდინარაძე ავალიანის საქმეზე დაზარებულებს მიმართავს - ნუ დავასწრებთ მოვლენებს

კუპრაძე - მოქალაქეებო კამერებით რუსული სპეცსამსახურები გვითვალთვალებენ, ეს ყველაფერი ივანიშვილის ანტიქართულმა რეჟიმმა აამოქმედა