ანა დოლიძე ფარული მოსმენების შესახებ კანონპროექტთან დაკავშირებით მესამე სექტორთან კონსულტაციებს გადის

2017-02-09 12:13:53, 1219 ნახვა

საზოგადოება

პრეზიდენტის საპარლამენტო მდივანი ანა დოლიძე მესამე სექტორის წარმოამდგენლებს ხვდება. შეხვედრაზე მმართველი გუნდის მიერ შემუშავებულ კანონპროექტზე მსჯელობენ, რომელიც ფარულ საგამოძიებო მოქმედებებს ეხება.

პროექტის მიხედვით, სახელმწიფო უსაფრთხოების სამსახურის შემადგენლობაში ახალი სააგენტო იქმნება. მოსმენების ე.წ. გასაღები სწორედ ამ სააგენტოს ხელში იქნება. არასამთავრობო ორგანიზაციები აცხადებენ, რომ კანონპროექტით საკონსტიტუციო სასამართლოს გადაწყვეტილება ირღვევა, რომლის მიხედვითაც გასაღები არ უნდა ჰქონდეს ორგანოს, რომელსაც საგამოძიებო ფუნქცია აქვს.

კანონპროექტის ავტორები და ინიციატორები ეკა ბესელია, არჩილ თალაკვაძე, მამუკა მდინარაძე, ირაკლი სესიაშვილი, გიორგი ვოლსკი, სოფიო კილაძე არიან.

უწყების შექმნა 14 აპრილს საკონსტიტუციო სასამართლოს გადაწყვეტილების შედეგად გახდა საჭირო. სასამართლომ ფარული მიყურადების განხორციელების საკანონმდებლო ნორმები არაკონსტიტუციურად ცნო.

Patreon P მხარი დაუჭირე "ექსპრესნიუსს" →

ავტორი: ირაკლი მანაგაძე , ექსპრესნიუსის რეპორტიორი 2009 წლიდან