ლელა ჩიქოვანის სომხეთის წარმომადგენლებს შეხვდა

2016-10-07 15:55:35, 697 ნახვა

საზოგადოება

თავდაცვის უწყების ხელმძღვანელი პირები დიპლომატიური კორპუსის წარმომადგენლებთან შეხვედრებს განაგრძობენ.

თავდაცვის სამინისტროს ინფორმაციით, დღეს მინისტრის პირველმა მოადგილემ საქართველოში სომხეთის რესპუბლიკის საელჩოს მრჩეველს, კარენ პარუნაკიანსა და სომხეთის თავდაცვის ატაშეს, პოლკოვნიკ სამუელ რამაზიანს უმასპინძლა.

უწყების ინფორმაციით, ლელა ჩიქოვანმა სტუმრებს საქართველოს თავდაცვის მინისტრის სახელით სომხეთის თავდაცვის სამინისტროსა და შეიარაღებულ ძალებში ახალი ხელმძღვანელი პირების დანიშვნა მიულოცა და მათ წარმატებები უსურვა.

შეხვედრაზე საქართველოსა და სომხეთს შორის თავდაცვის სფეროში არსებული თანამშრომლობის მნიშვნელობა ხაზგასმით აღნიშნეს და თანამშრომლობის გაგრძელებისა და გაღრმავების სურვილი გამოთქვეს.

საუბარი შეეხო ორ ქვეყანას შორის თავდაცვის სფეროში სამხედრო განათლების კუთხით არსებულ მჭიდრო თანამშრომლობასა და ამ მხრივ გამოცდილების გაზიარებას.

შეხვედრის ერთ-ერთი თემა რეგიონში არსებული უსაფრთხოების გარემო და სამეზობლო პოლიტიკა იყო. მხარეებმა რეგიონული უსაფრთხოების ფარგლებში თანამშრომლობის გაღრმავების სურვილი გამოთქვეს და ერთმანეთის მხარდაჭერის მნიშვნელობაზე ისაუბრეს.

(NS)

Patreon P მხარი დაუჭირე "ექსპრესნიუსს" →

ავტორი: ირაკლი მანაგაძე , ექსპრესნიუსის რეპორტიორი 2009 წლიდან