იუსტიციის სამინისტროს სსიპ „დანაშაულის პრევენციის ცენტრის“ დირექტორი ირაკლი ხელაძე კონფერენციას - „სოციალური მეწარმეობა საქართველოში“ - დაესწრო. ღონისძიებაზე „ყოფილ პატიმართა რეაბილიტაციისა და რესოციალიზაციის პროგრამის“ ბენეფიციარების დასაქმების მიზნით შექმნილი სოციალური საწარმოს - „შეცვალე სცენარის“ - შედეგების პრეზენტაცია გაიმართა.

ღონისძიებას შვეიცარიის ელჩი საქართველოში ლუკას ბეგლინგერი და მიგრაციის საერთაშორისო ორგანიზაციის საქართველოს მისიის ხელმძღვანელი ილიანა დერილოვა, ასევე, სხვა სოციალური საწარმოების წარმომადგენლები დაესწრნენ.

სოციალური საწარმოს - „შეცვალე სცენარის“ - ფარგლებში ორი ობიექტი - კაფეტერია და ავტოსამრეცხაო შეიქმნა. ორივე ობიექტის ხელმძღვანელი, ბუღალტერი და 3 მზარეული პროფესიული ნიშნით შეირჩნენ, ხოლო დამხმარე პოზიციები ყოფილ პატიმართა რეაბილიტაციის პროგრამის ბენეფიციარებმა და მათი ოჯახის წევრებმა დაიკავეს. ჯამში, ორივე ობიექტზე 20-ზე მეტი პირი დასაქმდა. მათგან 11 ყოფილი პატიმარია, 7 კი – ყოფილი პატიმრის ოჯახის წევრი.

სოციალური საწარმოს საშუალებით, ყოფილ პატიმართა რეაბილიტაციის პროგრამის ბენეფიციარებს შემოსავლის წყარო გაუჩნდათ. გარდა ამისა, დასაქმებული ბენეფიციარები იუმჯობესებენ იმ შრომით და საკომუნიკაციო უნარ-ჩვევებს, რაც მომავალში მათ წარმატებულ საქმიანობას შეუწყობს ხელს.

სოციალური საწარმო სსიპ „დანაშაულის პრევენციის ცენტრის" მიერ და მიგრაციის საერთაშორისო ორგანიზაციის საგრანტო პროგრამის ფარგლებში შეიქმნა.  მიგრაციის საკითხებში შვეიცარიის ფედერალური ოფისის მიერ საგრანტო პროექტი 87 500 შვეიცარიული ფრანკით დაფინანსდა. პროგრამის სახელწოდებაა - „სოციალური საწარმოების განვითარება საქართველოს მოქალაქეთა და პოტენციურ მიგრანტებს შორის ნარკომოხმარების პრობლემის შემცირებისა და მათი სოციალურ-ეკონომიკური ინტეგრაციის მიზნით". ამ პროგრამის ფარგლებში „შეცვალე სცენარის“ გარდა, კიდევ ოთხი სოციალური საწარმო შეიქმნა. კონფერენციას პრობაციის ეროვნული სააგენტოს წარმომადგენლები დაესწრნენ, რომლებმაც ამავე პროგრამის ფარგლებში შექმნილი საწარმოს შედეგების პრეზენტაცია გამართეს. აღსანიშნავია, რომ საქართველოში მიგრაციის საკითხებში შვეიცარიის ფედერალური ოფისის მიერ დაფინანსებული ხუთი სოციალური საწარმო შარშან გაიხსნა. კონფერენციაზე წარმოდგენილი იყო ხუთივე საწარმოს მუშაობის ამსახველი ფოტოგამოფენა.

საქართველოში „ყოფილ პატიმართა რეაბილიტაციისა და რესოციალიზაციის პროგრამა" 2012 წლის ბოლოს იუსტიციის მინისტრის ინიციატივით შეიქმნა. 

პროგრამას სსიპ „დანაშაულის პრევენციის ცენტრი" ახორციელებს. მისი მიზანია სასჯელაღსრულების დაწესებულებებიდან გათავისუფლებული პირების რეაბილიტაციის ხელშეწყობა, მათი დაბრუნება საზოგადოების სრულუფლებიან წევრებად. ყოფილ პატიმრებზე სახელმწიფო მზრუნველობა საზოგადოების განმეორებითი დანაშაულისაგან დაცვის წინაპირობაა. პროგრამით გათვალისწინებულია ყოფილ პატიმართა ოჯახის წევრების დახმარებაც.

ავტორი: ირაკლი მანაგაძე , ექსპრესნიუსის რეპორტიორი 2009 წლიდან

სოციალური ქსელები

საქართველოს რკინიგზის საქმეზე ბრალდებულებს აღკვეთის ღონისძიებად პატიმრობა შეეფარდათ

ნანუკა ჟორჟოლიანი არ გამორიცხავს, ნაციონალური მოძრაობის თავმჯდომარეობისთვის იბრძოლოს

გოგა ხაინდრავამ ფორმულას უჩივლა, პროკურატურამ გამოძიება ცრუ დასმენის მუხლით დაიწყო

20 ივნისის საქმეზე გიორგი გახარიას წინააღმდეგ მაკო გომურმა სასამართლოს ჩვენება მისცა