ეთნოგრაფიულ მუზეუმში ვაზის უნიკალური ჯიშები გაშენდა

2016-05-11 17:04:49, 555 ნახვა

საზოგადოება

სოფლის მეურნეობის სამეცნიერო კვლევითი ცენტრისა და საქართველოს საპატრიარქოს მევენახეობა-მეღვინეობის ეროვნული სამეცნიერო ცენტრის ორგანიზებით გ. ჩიტაიას სახელობის ეთნოგრაფიული მუზეუმის ტერიტორიაზე ქართული უნიკალური ენდემური ვაზის ჯიშები გაშენდა.

სოფლის მეურნეობის სამინისტროს ინფორმაციით, აღნიშნული ღონისძიება საქართველოს კათოლიკოს პატრიარქის ილია მეორეს ლოცვა კურთხევით დაიგეგმა.

ქართული ვაზის გაშენების პროცესს დაესწრო კათოლიკოს-პატრიარქის ქორეპისკოპოსი, ახალციხისა და ტაო-კლარჯეთის მიტროპოლიტი თეოდორე (ჭუაძე), სოფლის მეურნეობის მინისტრის მოადგილე იური ნოზაძე, სამეცნიერო-კვლევითი ცენტრის დირექტორი ლევან უჯმაჯურიძე და მუზეუმის ადმინისტრაცია.

მუზეუმის ტერიტორიაზე საქართველოს სხვადასხვა რეგიონების ამსახველ საკარმიდამო ზონებში ამ რეგიონებისათვის დამახასიათებელი ვაზის წამყვანი ჯიშები დაირგო.

პროექტის ერთ-ერთი მიზანი, ჩვენი ქვეყნის უცხოელი სტუმრებისათვის ქართული რვაათასწლიანი უნიკალური კულტურული მემკვირდეობის მევენახეობა-მეღვინეობის პოპულარიზაციაა.

ამავდროულად, სოფლის მეურნეობის-სამეცნიერო კვლევითი ცენტრის, საქართველოს საპატრიარქოს მევენახეობა-მეღვინეობის ეროვნული-სამეცნიერო ცენტრისა და გორის სახელმწიფო უნივერსიტეტის ერთობლივი ძალისხმევით კიდევ ერთ ეროვნულ ინიციატივას ჩაეყარა საფუძველი. ჯიღაურას კვლევით ბაზაზე არსებული საკოლექციო ვენახების 100-ზე მეტი დასახელების უნიკალური ვაზის ჯიშები რომელიც ცენტრის მიერ იქნა აღდგენილი და გაშენებული დღეს გორის სახელმწიფო უნივერსიტეტის ტერიტორიაზეც დაირგო.

Patreon P მხარი დაუჭირე "ექსპრესნიუსს" →

ავტორი: ირაკლი მანაგაძე , ექსპრესნიუსის რეპორტიორი 2009 წლიდან