გომის საზოგადოებრივ ცენტრს გიორგი კეკელიძე ესტუმრა

2016-04-20 12:03:12, 588 ნახვა

საზოგადოება

საქართველოს იუსტიციის სამინისტროს სსიპ „დანაშაულის პრევენციის ცენტრის“ ორგანიზებით, გომის საზოგადოებრივ ცენტრში გომისა და ვაყას სკოლის მოსწავლეებს მწერალი გიორგი კეკელიძე შეხვდა.

დანაშაულის პრევენციის ცენტრის ინფორმაციით, შეხვედრა პროექტ „წიგნის კლუბის“ ფარგლებში გაიმართა და მას 26 მოსწავლე დაესწრო.

სტუმარი ახალგაზრდებს ქართული ენისა და წიგნის მნიშვნელობაზე ესაუბრა. გაიმართა მცირე დისკუსია განათლებისა და წიგნიერების როლზე თანამედროვე საზოგადოებაში. მონაწილეებმა ისაუბრეს იმ ლიტერატურაზე, რომელსაც ეცნობიან; თითოეულ მათგანს ჰქონდა შესაძლებლობა ლიტერატურიდან საინტერესო თემები და პერსონაჟები დაესახელებინა.

საქართველოს ეროვნული ბიბლიოთეკის დირექტორი, მწერალი გიორგი კეკელიძე აქტიურად თანამშრომლობს სსიპ „დანაშაულის პრევენციის ცენტრთან“, რომლის ახალგაზრდული პროგრამების მიზანია მოზარდებში სამართლებრივი და სამოქალაქო ცნობიერების ამაღლება, მოხალისეობრივი კულტურის განვითარების ხელშეწყობა. ამ მიზნით სხვადასხვა ახალგაზრდული პროგრამა იუსტიციის სახლებსა და საზოგადოებრივ ცენტრებში მიმდინარეობს. საზოგადოებრივი ცენტრების განვითარება საქართველოში იუსტიციის სამინისტროს სახელმწიფო სერვისების განვითარების სააგენტოს ერთ-ერთი ინიციატივაა.

საზოგადოებრივი ცენტრების მიზანია მოსახლეობისთვის სახელმწიფო სერვისებზე ხელმისაწვდომობის გაზრდა და სოფლის განვითარებისთვის შესაბამისი გარემოს შექმნა.

Patreon P მხარი დაუჭირე "ექსპრესნიუსს" →

ავტორი: ირაკლი მანაგაძე , ექსპრესნიუსის რეპორტიორი 2009 წლიდან