თბილისის საქალაქო სასამართლოში, 12:00 საათზე „რიყისა“ და „თბილსერვისის“ საქმეზე დასკვნითი პროცესი უნდა გაიმართოს.

სასამართლოს ეზოში  „ნაციონალური მოძრაობის“ წარმომადგენლები და გიგი უგულავას მხარდამჭერები იკრიბებიან. ადგილზე მობილიზებულია პოლიცია.

ჯერჯერობით უცნობია, დღევანდელ სასამართლო პროცესზე იტყვის თუ არა გიგი უგულავა დასკვნით სიტყვას.

 იმ შემთხვევაში, თუ დაცვის მხარე დასკვნითი სიტყვის დარჩენილ ნაწილს იტყვის, გამორიცხული არ არის, მოსამართლემ გადაწყვეტილება დღესვე მიიღოს.

ადვოკატ ბექა ბასილაიას განცხადებით, გიგი უგულავას წინააღმდეგ საქმე პოლიტიკურად მოტივირებულია, რაც მმართველი გუნდის განცხადებებმა დაადასტურა.

ადვოკატის მტკიცებით, სასამართლოს გადაწყვეტილება მმართველ პოლიტიკურ გუნდთან შეთანხმებულია.

„საპარლამენტო უმრავლესობის ლიდერი, საუბრობს, რომ უგულავას მიუსჯიან. ერთ–ერთი კომიტეტის თავჯდომარე თამაზ მეჭიაური საუბრობს, რომ უგულავა მხოლოდ რამდენიმე საათი იქნება თავისუფალი. ეს საქმე რომ თავიდან ბოლომდე პოლიტიკურად მოტივირებულია და სასამართლო გადაწყვეტილება მმართველ პოლიტიკურ გუნდთან არის შეთანხმებული, ეს აშკარად იკვეთება ამ ადამიანების ღია განცხადებებით. ამის კიდევ დასტური მივიღეთ დღეს, როცა პროკურორმა გიგი უგულავას სხვა საქმის გადადება მოითხოვა იმ მოტივით, რომ როგორმე გაიმართოს „თბილსერვისის“ პროცესი. ანუ აქ ისინი დაბეჯითებით დარწმუნებულები არიან, რომ სასამართლოსთან შეთანხმების გზით მიიღებენ გადაწყვეტილებას, რომელიც გიგი უგულავას პოლიტიკურ პატიმრობას განაახლებს. დღევანდელ პორცესზე დასკვნითი სიტყვის ეტაპზე ვართ მისული. გაიმართება პროცესი და ყველა პროცედურას ადგილზე ვნახავთ“, – განაცხადა ბექა ბასილაიამ.

ბრალდების მხარე კი იმედოვნებს, რომ დაცვის მხარე დღევანდელ სასამართლო პროცესზე მომზადებული იქნება და დასკვით სიტყვას იტყვის.

პროკურორ გიგა ძნელაძის განცხადებით, დაცვის მხარის მიერ დასკვნითი სიტყვის დარჩენილი ნაწილის თქმის შემდეგ, სასამართლო შემაჯამებელი გადაწყვეტილების მისაღებად გავა.

ამიტომ, პროკურორის თქმით, სავსებით შესაძლებელია, დღევანდელ სასამართლო პროცესზე მოსამართლე სათათბიროდ გავიდეს.

„სასამართლო დაცვის მხრიდან დასკვნით სიტყვას 4 თვეა ელოდება. გუშინ კიდევ ერთხელ მიეცა შესაძლებლობა გიგი უგულავას. როგორც ბრალდებულმა განაცხადა, ემოციური ფონის გამო ვერ იტყვის. აქედან გამომდინარე, ბრალდების მხარის მოლოდინია, რომ დაცვის მხარე დღეს მომზადებული გამოცხადდება და დასკვნითი სიტყვის დარჩენილ ნაწილს იტყვის. აღნიშნულის შემდეგ, სასამართლო გავა შემაჯამებელი გადაწყვეტილების მისაღებად.  სავსებით შესაძლებელია, დღევანდელ პროცესზე მოსამართლე გავიდეს სათათბიროდ. თუ რამდენ ხანში გამოაცხადებს მოსამართლე გადაწყვეტილებას, ეს ცალსახად მოსამართლის პრეროგატივაა“, – განაცხადა გიგა ძნელაძემ.

ავტორი: ირაკლი მანაგაძე , ექსპრესნიუსის რეპორტიორი 2009 წლიდან

სოციალური ქსელები

ტელეკომპანია „დოჟდის“ მთავარ რედაქტორს ტიხონ ძიადკოს „ყალბი ამბების“ საქმეში რვა წლით თავისუფლების აღკვეთა მიესაჯა

სამეფო ოპერის თეატრმა დიდი ბრიტანეთის პრემიერ-მინისტრს პაატა ბურჭულაძის საქმეში ჩარევისკენ მოუწოდა

საქართველოს რაგბის ეროვნული ნაკრების ყოფილი კაპიტანს დოპინგის ბრალდებით 11 წლით დისკვალიფიკაცია მისცეს

EU-ის წარმომადგენლობა: ვულოცავთ შიო III-ს სრულიად საქართველოს კათოლიკოს-პატრიარქად გამორჩევას