აჭარის ავტონომიურ რესპუბლიკასა და ნიკოლაევის ოლქს შორის მემორანდუმი გაფორმდა

2015-09-17 12:38:51, 605 ნახვა

საზოგადოება

აჭარის მთავრობის თავმჯდომარე არჩილ ხაბაძე ბათუმში ოფიციალური ვიზიტით მყოფ ნიკოლაევის ოლქის დელეგაციას შეხვდა.

აჭარის მთავრობის ადმინსიტრაციის პრესსამსახურის ინფორმაციით, დელეგაციის შემადგენლობაში შედიან ნიკოლაევის ოლქის სახელმწიფო ადმინისტრაციის ხელმძღვანელი პირები, დეპუტატები, პრესისა და მასმედიის წარმომადგენლები. შეხვედრისას აჭარის მთავრობის თავმჯდომარემ სტუმრებს რეგიონში არსებული საინვესტიციო გარემო, ტურისტული და ეკონომიკური პოტენციალი გააცნო. ისაუბრა ასევე რეგიონში მიმდინარე პროექტებსა და სამომავლო ღონისძიებებზე.

შეხვედრის შემდეგ ხელი მოეწერა მემორანდუმს ნიკოლაევის ოლქის სახელმწიფო ადმინისტრაციასა (უკრაინა) და აჭარის ავტონომიური რესპუბლიკის მთავრობას (საქართველო) შორის სავაჭრო-ეკონომიკურ, სამეცნიერო-ტექნიკურ და კულტურულ სფეროებში თანამშრომლობისთვის.

მემორანდუმი ითვალისწინებს ვაჭრობის, სამრეწველო, საინვესტიციო და ეკონომიკის სხვა დარგში ორმხრივი თანამშრომლობის განვითარებაში ხელშეწყობას. მხარეები გაუწევენ ორგანიზებას საწარმოების პროდუქციის გამოფენებისა და ბაზრობების ჩატარებას, ითანამშრომლებენ სოფლის მეურნეობის მიმართულებით. სავაჭრო-ეკონომიკური თანამშრომლობის ეფექტურობის ამაღლების მიზნით, მხარეები ადგილობრივი საწარმოების მიერ წარმოებული საექსპორტო პროდუქციისა და მომსახურების ძირითადი სახეობების შესახებ ინფორმაციებს გაცვლიან. ასევე განხორციელდება გაცვლითი პროგრამები, რომლის თანახმადაც მოხდება სპეციალისტების სტაჟირება საგარეო ეკონომიკური საქმიანობის შესახებ გამოცდილების შესწავლის მიზნით.

მემორანდუმი ასევე ითვალისწინებს ჯანდაცვისა და განათლების სფეროში სხვადასვა ერთობლივი და გაცვლითი პროექტების განხორციელებას როგორც სტუდენტთა , ასევე პროფესიონალთა გდაამზადების მიზნით.

ვიზიტის ფარგლებში აჭარის ხელოვნების მუზეუმში გაიმართება უჯკრაინელი მხატვრებისა და ფოტოგრაფების ნამუშევართა გამოფენა „ჯოჯოხეთური აეროპორტი“, რომელიც ბათუმში რამდენიმე დღეს დარჩება.

ვიზიტის ფარგლებში დაგეგმილია შეხვედრები ბათუმის მერთან და საკრებულოს თავმჯდომარესთან.

სამდღიანი ვიზიტის ფარგლებში უკრაინის დელეგაციის წევრები დაესწრებიან ბათუმში, სასტუმრო ჰილტონში 18 სექტემბერს გამართულ საინვესტიციო ფორუმს „ბათუმი 2015“ და მოინახულებენ ბათუმის ღირსშესანიშნაობებს .