დავით ბაქრაძე ახალი უმაღლესი სასწავლებლის სტუდენტებს შეხვდა

2015-06-08 15:24:05, 336 ნახვა

პოლიტიკა

ევროპულ და ევროატლანტიკურ სტრუქტურებში ინტეგრაციის საკითხებში სახელმწიფო მინისტრი დავით ბაქრაძე მთავრობის ადმინისტრაციაში ახალი უმაღლესი სასწავლებლის სტუდენტებს შეხვდა.
შეხვედრაზე საქართველოს ევროპულ და ევროატლანტიკური მისწრაფებების შესახებ და ამ კუთხით, მთავრობის მიერ განხორციელებული რეფორმების თაობაზე ისაუბრეს. გარდა ამისა, საუბარი შეეხო ვიზალიბერალიზაციის თემასა და საქართველოს წინაშე არსებულ გამოწვევებს.
"ჩვენ სისტემატიურად ვახორციელებთ შეხვედრებს. ძალიან მნიშვნელოვანია, როცა გვიწევს ობიექტური ინფორმაციის მიწოდება ჩვენი საზოგადოებისთვის, ევროპული და ევროატლანტიკური მისწრაფებების შესახებ. სწორედ ამაზე ვისაუბრეთ. სტუდენტებს გავაცანით ის რეფორმები, რასაც ამ კუთხით საქართველოს მთავრობა ახორციელებს.მის მნიშვნელობაზე გავამახვილეთ ყურადღება, შევეხეთ ვიზალიბერალიზაციის თემებსაც, რომლითაც სტუდენტები ძალიან დაინტერესდნენ; ვისაუბრეთ იმ გამოწვევებზე, რომლებიც ქვეყნის ტერიტორიული მთლიანობის კუთხით საქართველოს გააჩნია და რეგიონულ კონტექსტში არსებულ ვითარებაზე",-განაცხადა დავით ბაქრაძემ შეხვედრის დასრულების შემდეგ.
მისივე თქმით, რამდენიმე უმაღლეს სასწავლებელთან ხელმოწერილი მემორანდუმის ფარგლებში, აპარატში სტაჟირების გასავლელად სტუდენტები მიიწვიეს.
"თანამშრომლობის კუთხით ჩვენ გამოვხატავთ ინტერესს და უკვე გვაქვს რამდენიმე უმაღლეს სასწავლებელთან ხელმოწერილი მემორანდუმი, ვთანამშრომლობთ მათთან და მოვიწვიეთ სტუდენტები, განსაკუთრებით ზაფხულის პერიოდში, რათა ჩვენს აპარატში მათ პრაქტიკისათვის სტაჟირების გავლის შესაძლებლობა მივცეთ",-აღნიშნა დავით ბაქრაძემ.