მომავალ წელს საქართველოს პოლონეთის პრეზიდენტი ანჟეი დუდა ეწვევა

2016-12-16 19:08:30, 1616 ნახვა

პოლიტიკა

საქართველოს პრეზიდენტს გიორგი მარგველაშვილს დღეს პოლონეთის რესპუბლიკის ახლადდანიშნულმა ელჩმა საქართველოში მარიუშ მაშკიევიჩმა რწმუნებათა სიგელები გადასცა.

პრეზიდენტის ადმინისტრაციის პრესსამსახურის ინფორმაციით, სიგელების გადაცემის ოფიციალური ცერემონიის დასრულების შემდეგ, პრეზიდენტმა ახლადდანიშნულ ელჩთან გაცნობითი ხასიათის შეხვედრა გამართა.

მათივე ინფორმაციით, მხარეებმა საქართველოსა და პოლონეთს შორის არსებული ურთიერთობა და თანამშრომლობის სამომავლო გეგმები განიხილეს.

პოლონელმა დიპლომატმა გიორგი მარგველაშვილს კიდევ ერთხელ დაუდასტურა საქართველოს ტერიტორიული მთლიანობისა და სუვერენიტეტის, არაღიარების პოლიტიკის, ასევე ევროპული და ევროატლანტიკური მისწრაფების მტკიცე მხარდაჭერა.

შეხვედრისას საუბარი შეეხო ასევე, პოლონეთის პრეზიდენტის ანჟეი დუდას ვიზიტისათვის მზადების საკითხს, რომელიც საქართველოს მომავალ წელს ეწვევა.

მარიუშ მაშკიევიჩმა აღნიშნა, რომ პოლონეთის რესპუბლიკის ელჩის რანგში, იგი ძალისხმევას არ დაიშურებს ორი ქვეყნის ურთიერთობების კიდევ უფრო გააქტიურების საქმეში.

საქართველოს პრეზიდენტმა პოლონეთის ახლადდანიშნულ ელჩს მომავალ საქმიანობაში წარმატება უსურვა.

Patreon P მხარი დაუჭირე "ექსპრესნიუსს" →

ავტორი: ირაკლი მანაგაძე , ექსპრესნიუსის რეპორტიორი 2009 წლიდან