„ეს არის ნაბიჯი, რომელიც მოგვცემს შესაძლებლობას, ჩვენს ქვეყანაში შეიქმნას  ახალი განათლებისა და ტექნოლოგიური განვითარების ძალიან დიდი კერა“ - ასე შეაფასა მედიასთან საუბრისას პირველმა ვიცე-პრემიერმა საუნივერსიტეტო ქალაქის მშენებლობის პროექტი, რომელიც ფონდ „ქართუს“ დაფინანსებით ქუთაისში განხორციელდება. 

ქუთაისის საუნივერსიტეტო ქალაქის მშენებლობა საქართველოში ერთ-ერთი ყველაზე გრანდიოზული პროექტია. 60 000 სტუდენტზე გათლილი, 1 მილიონი კვ/მ ფართის  მეგაკომპლექსი  140 ჰექტარზე გაშენდება. როგორც პრეზენტაციაზე ითქვა, საუნივერსიტეტო ქალაქში  საფუძველი ჩაეყრება განათლების, მეცნიერებისა და ქვეყნის ინტელექტუალური რესურსების სრულიად ახალ სტანდარტებს. მილიარდი ევროს ღირებულების სამეცნიერო-საგანმანათლებლო მეგაპროექტს მთლიანად  ფონდი „ქართუ”აფინანსებს.

„მინდა დიდი მადლობა გადავუხადო ფონდ „ქართუს“ და ბიძინა ივანიშვილს, რომლის დაფინანსებითაც განხორციელდება ერთი მილიარდი ევროს ოდენობის ინვესტიცია ქალაქ ქუთაისში. ეს არის ძალიან წინგადადგმული ნაბიჯი, ეს არის ნაბიჯი, რომელიც მოგვცემს შესაძლებლობას, რომ ჩვენს ქვეყანაში შეიქმნას ძალიან დიდი კერა ახალი განათლებისა და ტექნოლოგიური განვითარების. ამავე დროს, ძალიან მნიშვნელოვანია, აქ შეიქმნას რეგიონალური ცენტრი, რადგან მოგეხსენებათ, რომ სტუდენტები, რომლებიც აქ ისწავლიან, აუცილებლად გახდებიან ჩვენი ელჩები მას მერე, რაც თავიანთ ქვეყნებში დაბრუნდებიან“ - განაცხადა დიმიტრი ქუმსიშვილმა.

როგორც პერეზენტაციაზე ითქვა, საუნივერსიტეტო  ქალაქში განლაგებული ტექნოლოგიური უნივერსიტეტის მეშვეობით ქვეყანაში შეიქმნება ადგილობრივი, მაღალკვალიფიციური კადრების ბაზა საქართველოს ეკონომიკის განვითარებისთვის აუცილებელი ყველა დარგის მიმართულებით. შეიქმნება რეგიონალური საგანმანათლებლო-სამეცნიერო მნიშვნელობის ჰაბი, რომელიც ამერიკული და ევროპული სტანდარტის უმაღლესი განათლების მიღების შესაძლებლობას მისცემს ქართველ და უცხოელ სტუდენტებს. გამოგონებები და ინოვაციები, ისევე როგორც გამოყენებითი მეცნიერებები, ინტერდისციპლინარული პროგრამები და კვლევები შექმნის მათ  კომერციალიზაციის და ცოდნაზე დაფუძნებული ეკონომიკის განვითარების საუკეთესო პირობებს.

ქუთაისის საუნივერსიტეტო ქალაქი  კავკასიის რეგიონში უდიდესი და ყველაზე თანამედროვე სამეცნიერო-საგანმანათლებლო   ცენტრი იქნება.

(NS)

ავტორი: ირაკლი მანაგაძე , ექსპრესნიუსის რეპორტიორი 2009 წლიდან

სოციალური ქსელები

პოლონეთმა ზელენსკის მიერ დაბრუნებული „თეთრი არწივის ორდენის“ მიღება დაადასტურა

გვარამია ენმ-ზე - ხალხი ერთ პარტიაშია და ბრიფინგებით, სატელევიზიო ეთერებით და სტატუსებით ელაპარაკება ერთმანეთს და წყევლის და აგინებს

მოქალაქეების 71% მხარს უჭერს ქვეყნის ევროკავშირში გაწევრიანებას, თუმცა 49% მიიჩნევს, რომ საქართველო ევროინტეგრაციის პროცესში არასწორი მიმართულებით მიდის

ლელო: სააკაშვილის განცხადება პოლიტიკური განხეთქილების შექმნის მცდელობაა