ევროპის საბჭოს ადამიანის უფლებათა კომისარმა მაიკლ ო’ფლაერტიმ მოუწოდა საქართველოს ხელისუფლებას, უზრუნველყოს ქვეყნის სამართალდამცავი ორგანოების ანგარიშვალდებულება, გააუქმოს შემზღუდავი „უცხოური გავლენის“ კანონები და გააგრძელოს იძულებით გადაადგილებულ პირთა უფლებების მხარდაჭერა.

ევროპის საბჭოს ადამიანის უფლებათა კომისარმა ეს განცხადება ო’ფლაერტის 14-15 აპრილს საქართველოში ვიზიტის შემდეგ გააკეთა.

აღნიშნულია, რომ კომისრის საქართველოში ვიზიტის დროს ყურადღება გამახვილდა სახელმწიფო აგენტების პასუხისმგებლობის არარსებობაზე 2024 და 2025 წლების დასაწყისში საპროტესტო აქციების ძალადობრივი დარბევის, გამოხატვის თავისუფლების, მშვიდობიანი შეკრებისა და გაერთიანების უფლებების და აფხაზეთისა და ცხინვალის რეგიონის ოკუპირებული ტერიტორიებიდან იძულებით გადაადგილებულ პირთა ადამიანის უფლებების მზარდ შეზღუდვებზე.

„კომისარი მადლობას უხდის საქართველოს ხელისუფლებას თანამშრომლობისთვის. ის ასევე მიესალმება სამოქალაქო საზოგადოების, ადამიანის უფლებათა დამცველებისა და ჟურნალისტების მდგრადობას, რომლებიც აგრძელებენ მუშაობას სულ უფრო შემზღუდავ გარემოში“, - ნათქვამია განცხადებაში.

ხაზგასმულია, რომ საქართველოში ვიზიტის დროს ევროპის საბჭოს ადამიანის უფლებათა კომისარმა განიხილა ანგარიშვალდებულებისა და სამართალდამცავი ორგანოების საკითხები და რომ შეხვედრების დროს ო’ფლაერტიმ კიდევ ერთხელ გაიმეორა მოწოდება დემონსტრანტების წინააღმდეგ ქიმიური ნივთიერებების შემცველი წყლის ჭავლის გამოყენების დამოუკიდებელი და ყოვლისმომცველი გამოძიების ჩატარების შესახებ.

„მან ყურადღება გაამახვილა გაეროს 2020 წლის ადამიანის უფლებათა სახელმძღვანელო პრინციპებზე სამართალდამცავი ორგანოების წარმომადგენლების მიერ ნაკლებად ლეტალური იარაღის გამოყენების შესახებ და მოუწოდა ხელისუფლებას, გაითვალისწინონ ეს სახელმძღვანელო პრინციპები სამართალდამცავი ორგანოების საქმიანობის განხორციელებისას“, - განაცხადა ევროპის საბჭომ.

განცხადებაში ასევე აღნიშნულია დემოკრატიული თავისუფლებების შეზღუდვა, მათ შორის გამოხატვის თავისუფლების, მშვიდობიანი შეკრების და გაერთიანების თავისუფლების უფლების. ევროპის საბჭოს კომისარი აღნიშნავს ამ კანონების კუმულატიურ ეფექტს და ხაზს უსვამს, რომ ხელისუფლებამ მიიღო ზომები, რომლებიც კიდევ უფრო ზღუდავს მათ.

მან მოიყვანა შეკრებებისა და მანიფესტაციების შესახებ კანონში შეტანილი ახალი ცვლილებები, რომლებიც მოითხოვს პოლიციის წინასწარ შეტყობინებას, თუ დემონსტრაცია ტარდება ისეთ ადგილას, სადაც არის მანქანების ან ადამიანების მოძრაობა.

„გარდა ამისა, პოლიციას ენიჭება უფლებამოსილება, შეცვალოს დემონსტრაციის ადგილმდებარეობა ან დრო, თუ ეს ხელს უშლის სატრანსპორტო საშუალებებისა და ადამიანების თავისუფალ გადაადგილებას.

ადმინისტრაციულ სამართალდარღვევათა კოდექსში შეტანილი ცვლილებები 2025 წლის თებერვალში შემოღებულ 60-დღიან ადმინისტრაციულ დაკავების ვადას სხვა დანაშაულებზეც ავრცელებს, როგორიცაა ნიღბის ტარება ან გზის გადაკეტვა.

სისხლის სამართლის კოდექსში შეტანილი ახალი ცვლილებები საპროტესტო აქციებთან დაკავშირებული ადმინისტრაციული სამართალდარღვევების განმეორებით ჩადენისთვის ორ წლამდე თავისუფლების აღკვეთას ითვალისწინებს.

კომისარი შეშფოთებას გამოთქვამს, რომ ეს ცვლილებები მნიშვნელოვნად ზღუდავს მშვიდობიანი შეკრების უფლებას და შეუთავსებელია კონვენციით გათვალისწინებული აუცილებლობისა და პროპორციულობის პრინციპებთან“, - განაცხადა კომისარმა მაიკლ ო’ფლაერტის ოფისმა.

ავტორი: ექსპრესნიუსი,

სოციალური ქსელები

ევროპარლამენტი ევროკავშირში VPN-ების შეზღუდვას განიხილავს

შერის 49 წლის შვილი დედას სასამართლოში უჩივის ფინანსური დახმარების გაუქმების გამო

Forbes-ის მონაცემებით, დონალდ ტრამპის ქონება პრეზიდენტობის ერთ წელიწადში, 1.4 მილიარდი დოლარით გაიზარდა

მოსაყდრე შიო - ღირსეულად და წარმატებით უნდა ჩავატაროთ ის დიდი მოვლენა, რაც ხვალ გველის ყველას