ყოფილი პრემიერ-მინისტრი ირაკლი ღარიბაშვილი შესაძლოა „ქართულ ოცნებაში“ დაბრუნდეს. საპარლამენტო უმრავლესობის ერთ-ერთი ლიდერი, ვიცე-სპიკერი მანანა კობახიძე „ექსპრესნიუსთან“ საუბრისას ამბობს, რომ ამ საკითხთან დაკავშირებით კონკრეტულ ინფორმაციას არ ფლობს, თუმცა დეპუტატი ამის ალბათობასაც არ გამორიცხავს.

დეპუტატი აცხადებს, რომ არ ფლობს ინფორმაციას ყოფილა თუ არა ამ საკითხზე კომუნიკაცია კოალიციის დამფუძნებელ ბიძინა ივანიშვილთან.

მანანა კობახიძე მიესალმება თუ ირაკლი ღარიბაშვილი გუნდში დაბრუნდება. ამბობს, რომ ეს საკითხი „ოცნების“ პარტიულ ყრილობამდე უნდა გაირკვეს, რომელიც სავარაუდოდ აპრილში გაიმართება.

„ირაკლი ღარიბაშვილის გუნდიდან წასვლა, ჩვენთვის - „ქართული ოცნებისთვის“ სახარბიელო ნამდვილად არ იყო, პირიქით ჩვენ მის გუნდში დარჩენას ყოველთვის მივესალმებოდით. ირაკლი ღარიბაშვილს აქვს იმის რესურსი, რომ მას კიდევ შეუძლია ბევრი რამის გაკეთება, არა მარტო „ქართული ოცნებისთვის“ არამედ ზოგადად სახელმწიფოსთვის.

მან ძალიან დიდი ტვირთი აიღო თავის თავზე. იმ პერიოდში ძალიან რთული პერიოდი იყო. მძიმე მემკვიდრეობის პირობებში და იმ ვითარებაში, როდესაც კოალიციის ლიდერმა დატოვა პოლიტიკა, ძალიან რთული იყო ვითარება. ამ დროს მოუწია ახალგაზრდა პრემიერს პასუხისმგებლობის აღება“, - აცხადებს კობახიძე.

პარლამენტის პირველი ვიცე-სპიკერი აქვე დასძენს, რომ როდესაც ღარიბაშვილმა პრემიერის პოსტი დატოვა უმრავლესობაში იყო სურვილი, რომ ის კოალიციაში დარჩენილიყო.

„გვინდოდა, რომ მას ჩვენთან ერთად გაეგრძელებინა მუშაობა, თუმცა მან მაშინვე განაცხადა, რომ პრემიერობიდან გადადგომა პოლიტიკიდან წასვლას ნიშნავდა. ამის შემდეგ ჩვენ არ გვინახავს მისი აქტიურობა. მე პირადად მასთან კომუნიკაცია არ მქონია, შესაბამისად ჩემთვის უცნობია აქვს თუ არა სურვილი მას რომ გუნდში დაბრუნდეს. არც იმის შესახებ ვარ ინფორმირებული უმრავლესობა განიხილავს თუ არა პოლიტიკაში მისი დაბრუნების გეგმას.

ამ თემაზე ყოფილა თუ არა საუბარი ბიძინა ივანიშვილთან, ამაზეც არ მაქვს ინფორმაცია, თუმცა არ გამოვრიცხავ“, - აცხადებს კობახიძე, რომელიც მიიჩნევს, რომ ეს საკითხი „ქართული ოცნების“ პარტიულ ყრილობამდე უნდა გაირკვეს.

„პარტიის ყრილობას გაზაფხულზე ვგეგმავდით და აგერ გაზაფხულიც დაგვიდგა. პირველი პარტიული ყრილობა აპრილში გვქონდა. რამდენადაც ვიცი ეს ყრილობაც არ გადასცდება აპრილის თვეს, თუმცა კონკრეტული თარიღი ჯერ-ჯერობით ცნობილი არ არის.

ირაკლი ღარიბაშვილის აქტიურ პოლიტიკაში მონაწილეობის საკითხი ეს ნიშნავს პარტიის არჩევით ორგანოში მის დასახელებას, რაც იმას ნიშნავს რომ ეს საკითხი უნდა გაირკვეს ყრილობაზე. აქედან გამომდინარე ნებისმიერი საკადრო საკითხი ყრილობამდე უნდა იყოს გადაწყვეტილი, რათა ამ საკითხზე ყრილობაზე ვიმსჯელოთ“, - განუცხადა მანანა კობახიძემ „ექსპრესნიუსს“.

ავტორი: ირაკლი მანაგაძე , ექსპრესნიუსის რეპორტიორი 2009 წლიდან

სოციალური ქსელები

ერდოღანის რეჟიმმა თურქული კინოს ვარსკვლევები, მომღერლები და ოპოზიციონერების შვილებიც დააკავა

უკრაინის 19 მოქალაქე შველას ითხოვს, ისინი დარიალის გამშვებ პუნქტში გაუსაძლის მდგომარეობაში არიან

საქართველოში კრიპტოვალუტის გათეთრების საერთაშორისო საქმეზე ამერიკელმა, პოლონელმა და ქართველმა სამართალდამცველებმა ფართომასშტაბიანი სპეცოპერაცია ჩაატარეს

საწვავის ფასების ზრდა, საქართველოში, ინფლაციის ერთ-ერთ მთავარ ფაქტორად რჩება