რუსი აქტივისტი და არასამთავრობო ორგანიზაცია Frame-ის ხელმძღვანელი მაქსიმ ივანცოვი აცხადებს, რომ საქართველოში არ შემოუშვეს. 

როგორც ივანცოვი სოციალურ ქსელში წერს, მისი საქართველოში არშემოშვება რუსეთის საპრეზიდენტო არჩევნებისთვის ოპოზიციონერ კანდიდატ ბორის ნადეჟდინისთვის ხელმოწერების შეგროვებასთანაა კავშირში.

"არ შემომიშვეს, რადგან ნადეჟდინისთვის ხელმოწერების შეგროვების ფართი გამოვნახეთ. ხელმოწერების შეგროვების შემდეგ, პრობლემები მხოლოდ მე არ შემქმნია. დიდი ხანია, რაც შეიმჩნევა, რომ საქართველოს ხელისუფლება რეაგირებს არამხოლოდ საქართველოს პოლიტიკაზე გაკეთებულ კომენტარებზე, არამედ რუს ანტიპუტინისტ აქტივისტებზეც", - წერს ივანცოვი.

მისივე თქმით, საქართველოში ჩამოფრენის დროს საზღვარზე პასპორტში ბეჭედი ჩაურტყეს, თუმცა შემდეგ უკან დააბრუნეს საპასპორტო კონტროლის ზონაში.

"მათ მომცეს ფურცელი საქართველოში არშემოშვებაზე, ხელი მკრეს და უხეშად მელაპარაკებოდნენ, ცვლის ხელმძღვანელმა და რამდენიმე პოლიციელმა თვითმფრინავამდე მიმიყვანეს. მეუბნებოდნენ, რომ მე რუსეთისა და საქართველოს მტერი ვარ, ხოლო საქართველო თავად არიან", - წერს აქტივისტი.

მისივე თქმით, საქართველოში შემოსვლას კლვავ შეეცდება, ხოლო მის არ შემოშვებაზე მიღებულ გადაწყვეტილებას გაასაჩივრებს.

ცნობისთვის, ეს არ არის პირველი შემთხვევა, როდესაც საქართველოში სხვა ქვეყნის წარმომადგენლებს ახსნა-განმარტების გარეშე არ უშვებენ. 2022 წლის 12 დეკემბერს, რუსი ჟურნალისტი, Холод-ის პოდკასტის რედაქტორი ალექსეი პონომარევი საქართველოში არ შემოუშვეს.

18 სექტემბერს, არ შემოუშვეს უკრაინელი ტელეწამყვანი რომან დრიბნოი, რომელიც საქართველოში უკრაინის მხარდასაჭერ საქველმოქმედო გამოფენას უნდა დასწრებოდა. შემოსვლაზე უარი უთხრეს რუს ბლოგერ ალექსეი რომანოვსაც. 2023 წლის 12 იანვარს, აზერბაიჯანელმა ჟურნალისტმა, სეიმურ ჰაზიმ განაცხადა, რომ საქართველოში არ შემოუშვეს და ყოველგვარი ახსნა-განმარტების გარეშე უკან გააბრუნეს.

13 თებერვალს, რუსეთის კრიზისული ცენტრის Насилию.нет-ის დამფუძნებელი ანა რივინა არ შემოუშვეს. 20 თებერვალს, შემოსვლაზე უარი უთხრეს რუს მწერალსა და ჟურნალისტს, ფილიპ ძიადკოს. 14 მარტს, რუსული ოპოზიციური საინფორმაციო ტელეარხის ДОЖДЬ-ის ჟურნალისტი ალექსანდრა შევჩენკო, 29 მარტს, რუსი უფლებადამცველი და პუტინის კრიტიკოსი დარიანა გრიაზნოვა, 19 აპრილს, რუსი პუბლიცისტი ალექსანდრ არხანგელსკი, 10 მაისს, ჩეჩენი ჟურნალისტი ჟალავდი გერიევი არ შემოუშვეს ქვეყანაში.

2 ივნისს, საქართველოში რუსი ჟურნალისტი და მწერალი ვიქტორ შენდეროვიჩი, 25 აგვისტოს, რუსეთის ბავშვთა ყოფილი ომბუდსმენი პაველ ასტრახოვი, 12 დეკემბერს რუსი ნაციონალისტი და რუსეთის მიერ ექსტრემისტად გამოცხადებული დმიტრი დემუშკინი, ხოლო 2024 წლის 1-ელ თებერვალს, რუსი პოლიტოლოგი და პუბლიცისტი ფიოდორ კრაშენინიკოვი არ შემოუშვეს.

ავტორი: ექსპრესნიუსი,

სოციალური ქსელები

მაკრონმა სტარმერს მადლობა გადაუხადა და საფრანგეთსა და ბრიტანეთს შორის თანამშრომლობის გაგრძელება გამოაცხადა

ბრიტანეთის პრემიერ-მინისტრი თანამდებობიდან გადადგა

პოლონეთმა ზელენსკის მიერ დაბრუნებული „თეთრი არწივის ორდენის“ მიღება დაადასტურა

გვარამია ენმ-ზე - ხალხი ერთ პარტიაშია და ბრიფინგებით, სატელევიზიო ეთერებით და სტატუსებით ელაპარაკება ერთმანეთს და წყევლის და აგინებს