2022-11-16 16:20:56, 972 ნახვა

---

ლევან ხაბეიშვილი „ნაცმოძრაობის“ თავმჯდომარეობისთვის იბრძოლებს - „ჩემი მიზანია, მებრძოლი ოპოზიცია დაბრუნდეს“

მივიღე გადაწყვეტილება, მონაწილეობა მივიღო არჩევნებში და „ნაციონალურ მოძრაობის“ მხარდამჭერებს შევთავაზო საკუთარი კანდიდატურა,- ამის შესახებ ლევან ხაბეიშვილმა პარტიის ოფისში გამართულ ბრიფინგზე განაცხადა.

მისი თქმით,  ამ გამოწვევას იღებს, რომ დაბრუნდეს ძლიერი, აქტიური პარტია და "რეალური უკომპრომისო მებრძოლი ოპოზიცია" ქართულ პოლიტიკაში.

„ჩემმა მეგობრებმა, თანამებრძოლებმა რამდენიმე დღის წინ გაახმოვანეს და მოითხოვეს "ნაციონალურ მოძრაობაში" შიდა დემოკრატიული არჩევნები, სადაც ამომრჩევლების მხარდამჭერების მიერ არჩეული უნდა იყოს ახალი თავმჯდომარე. მნიშვნელოვანია, რომ ამ იდეას მხარი დაუჭირეს "ნაციონალური მოძრაობის" ლიდერებმა, რაიონული ორგანიზაციების ხელმძღვანელების დიდმა ნაწილმა და საკრებულოს წევრებმა.

არჩევნების მზაობა გამოთქვა პარტიის ხელმძღვანელმაც, რაც მისასალმებელი და მნიშვნელოვანია. რამდენიმე დღიანი კონსულტაციების შედეგად ჩემს მეგობრებთან და თანამებრძოლებთან ერთად მივიღე გადაწყვეტილება, მონაწილეობა მივიღო არჩევნებში და ნაციონალურ მოძრაობის მხარდამჭერებს შევთავაზო საკუთარი კანდიდატურა.

ამ გამოწვევას ვიღებ, რომ დაბრუნდეს ძლიერი, აქტიური ნაციონალური მოძრაობა და შესაბამისად დაბრუნდეს რეალური უკომპრომისო მებრძოლი ოპოზიცია ქართულ პოლიტიკაში. ჩემი მიზანია ნაციონალური მოძრაობა დავუბრუნო იმ ხალხს, ვისაც ეს ეკუთვნის, მის ამომრჩეველს მის მხარდამჭერებს და ყველას, ვისთვისაც ნაციონალური მოძრაობა რუსი ოლიგარქის, ბიძინა ივანიშვილის დამარცხების მთავარი პლატფორმა და შესაძლებლობაა.

ნაციონალური მოძრაობა უნდა დაუბრუნდეს იმ ხალხს, ვისთვისაც მნიშვნელოვანია ვარდების რევოლუციის იდეალები, იმ ადამიანებს ვინც მიუხედავად უამრავი წნეხისა და დევნისა არ შეუშინდა არაფერს და მზადაა თავი გაწიროს სამშობლოს კეთილდღეობისთის“,- განაცხადა ხაბეიშვილმა.

შეგახსენებთ, რომ 9 ნოემბერს, ირაკლი ნადირაძემ რეგიონულ ლიდერებთან ერთად გამართულ ბრიფინგზე განაცხადა, რომ "ერთიანი ნაციონალური მოძრაობის" ნაწილი პარტიაში შიდა არჩევნების ჩატარებასა და ახალი თავმჯდომარის არჩევას ითხოვს.

ამის საპასუხოდ, პარტიის მოქმედმა თავმჯდომარემ, ნიკა მელიამ თქვა, რომ ეს იყო ნაჩქარევი განცხადება, რომელსაც "შორსმიმავალი გეგმები" აქვს, თუმცა მზადაა, რომ თავმჯდომარის არჩევნებში მონაწილეობა მიიღოს.

თავმჯდომარის პოსტზე საკუთარი კანდიდატურა წარადგინა „ნაციონალური მოძრაობის“ წევრმა, გიორგი ჩალაძემ და ნიკა მელიასთან დაპირისპირებაში მყოფმა გიორგი მუმლაძემ.

---

ავტორი: ექსპრესნიუსი,

---

დღის თემა

მთავარი თემა

ინტერვიუ - ექსკლუზივი