საგარეო უწყება: ბერუჩაშვილის განცხადება ჟურნალისტის ინტერპრეტაცია იყო

2015-01-30 15:06:57, 807 ნახვა

პოლიტიკა

საგარეო საქმეთა სამინისტროს საზოგადოებასთან ურთიერთობის სამსახურში აცხადებენ, რომ საგარეო საქმეთა მინისტრის თამარ ბერუჩაშვილის განცხადება, რუსეთთან სავაჭრო ურთიერთობის შეჩერებაზე რადიო „თავისუფლების“ ჟურნალისტის ინტერპრეტაცია იყო.

როგორც „ექსპრესნიუსს“ საზოგადოებასთან ურთიერთობის სამსახურის უფროსმა მარი ნარჩემაშვილმა განუცხადა, ბერუჩაშვილის მხრიდან საუბარი კარასინი-აბაშიძის დიალოგის შეჩერებაზე იყო.

„ეს იყო რადიო „თავისუფლების“ ჟურნალისტის ინტერპრეტაცია, აქ საუბარი იყო მინისტრის მხრიდან კარასინი-აბაშიძის დიალოგის შეჩერებაზე და არა რუსეთთან სავაჭრო ურთიერთობის შეჩერებაზე, შესაბამისად ჟურნალისტის მიერ, ეს განცხადება არასწორად იყო აღქმული“, - განუცხადა „ექსპრესნიუსს“ მარი ნარჩემაშვილმა.

როგორც რადიო „თავისუფლება“ წერს, ბერუჩაშვილმა მათთან საუბარში აღნიშნა, რომ „ქართული მხარე რუსეთთან ვაჭრობის საკითხებზე დიალოგს დროებით აჩერებს“.

Patreon P მხარი დაუჭირე "ექსპრესნიუსს" →

ავტორი: ირაკლი მანაგაძე , ექსპრესნიუსის რეპორტიორი 2009 წლიდან