საკონსტიტუციო სასამართლოში გაიმართება ცხრა რელიგიური ორგანიზაციის კონსტიტუციური სარჩელის განმწესრიგებელი განხილვის სხდომა.  მოსარჩელეები მიიჩნევენ რომ მათ მიმართ ირღვევა საქართველოს კონსტიტუციის მე-11 მუხლით გათვალისწინებული თანასწორობის პრინციპი. 

 2019 წლის 12 აგვისტოს, 9 რელიგიურმა ორგანიზაციამ სარჩელით მიმართა საქართველოს საკონსტიტუციო  სასამართალოს. მოსარჩელეებს მიაჩნიათ, რომ "სახელმწიფო ქონების შესახებ" საქართველოს კანონის მე-3 მუხლის 1-ლი, მე-2 და მე-5 პუნქტების ნორმატიული შინაარსი ეწინააღმდეგება საქართველოს კონსტიტუციის მე-11 მუხლით განმტკიცებულ თანასწორობის პრინციპს.

 კანონში არსებული რეგულაციები საჯარო სამართლის იურიდიულ პირებად რეგისტრირებულ რელიგიურ ორგანიზაციებს არ აძლევს უფლებას, გახდნენ სახელმწიფო ქონების შემძენი, ასევე არ აძლევს სასოფლო-სამეურნეო დანიშნულების მიწის ნაკვეთის პრივატიზების შესაძლებლობას სასყიდლით და უსასყიდლოდ. გარდა ამისა, საჯარო სამართლის იურიდიულ პირებად რეგისტრირებულ რელიგიურ ორგანიზაციებს კანონი არ აძლევს შესაძლებლობას, სახელმწიფოსაგან მიიღოს ქონება ამ ქონების ტოლფასი ქონების სახელმწიფო საკუთრებაში გადაცემის სანაცვლოდ. კანონი ამ უფლებების სარგებლობას მხოლოდ საქართველოს სამოციქულო ავტოკეფალური მართლმადიდებელი ეკლესიისათვის უშვებს.

საყურადღებოა, რომ 2018 წლის 3 ივლისის გადაწყვეტილებით საქართველოს საკონსტიტუციო სასამართლომ არაკონსტიტუციურად ცნო "სახელმწიფო ქონების შესახებ" საქართველოს კანონის მე-6³ მუხლის 1-ლი პუნქტის ის ნორმატიული შინაარსი, რომელიც სახელმწიფო ქონების უსასყიდლოდ საკუთრებაში გადაცემის შესაძლებლობას ითვალისწინებდა მხოლოდ საქართველოს სამოციქულო ავტოკეფალური მართლმადიდებელი ეკლესიისათვის. სასამართლომ მიიჩნია, რომ აღნიშნული უფლების მხოლოდ ერთი რელიგიური ორგანიზაციისათვის მინიჭება დისკრიმინაციული.

 აღნიშნულ საქმეზეც რელიგიური გაერთიანების ინტერესებს სასამართლოში იცავენ  ტოლერანტობის და მრავალფეროვნების ინსტიტუტი (TDI) და თბილისის თავისუფალი უნივერსიტეტის სამართლის კლინიკა.

ავტორი: ექსპრესნიუსი,

სოციალური ქსელები

პუტინის უახლოეს თანამოაზრეებს შორის მისი ასაკის პირველი ადამიანი გარდაიცვალა - ივანოვი და საქართველო

საქართველოსთვის: კობახიძემ გაიფორმა თავი მოძალადე პრემიერად, ვერ გაექცევა პასუხისმგებლობას

პარლამენტის 2026 წლის საგაზაფხულო სესია ხელჩართული ჩხუბით დაიხურა

ექსპრეს ლომბარდი საკომუნიკაციო კამპანიას „ჰკითხე ექსპერტს“ აგრძელებს