ავტორიტეტული სარეიტინგო კომპანია „S&P“-ის მიერ ქვეყნის პერსპექტივის გაუმჯობესება ადასტურებს მიმდინარე რეფორმების წარმატებულ და შეუქცევად ხასიათს, - ამის შესახებ ეკონომიკის ექსპერტმა გიორგი ცუცქირიძემ განაცხადა.

მისი თქმით, სარეიტინგო კომპანია „S&P“-ის მიერ ქვეყნის პერსპექტივის გაუმჯობესება წარმოადგენს მნიშვნელოვან პოზიტიურ ფაქტორს, რამდენადაც ამით სარეიტინგო კომპანია მიიჩნევს, რომ საქართველოს ეკონომიკას აქვს შესაძლებლობა სარეიტინგო კომპანიის მოლოდინებსა და პროგნოზებსაც კი  გადააჭარბოს.  

„მიმაჩნია, რომ სარეიტინგო კომპანია „S&P“ მიერ გაკეთებული პოზიტიური შეფასება არ არის შემთხვევითი. იგი თანხვედრია მიმდინარე  წლის თებერვლის თვეში, კიდევ ერთი ავტორიტეტული საერთაშორისო სარეიტინგო კომპანია Fitch-ის შეფასებისა, რომელმაც საქართველოს სუვერენული საკრედიტო რეიტინგი „BB-“-დან „BB“-მდე გააუმჯობესა. მსოფლიოს ერთ-ერთი წამყვანი სააგენტოს მხრიდან ქვეყნის საკრედიტო რეიტინგის ზრდა მნიშვნელოვანია იმ თვალსაზრისითაც, რომ არის პირდაპირი სიგნალი საერთაშორისო ბიზნეს–საზოგადოებისთვის, პოტენციური ინვესტორებისთვის, რომ საქართველო არის რეგიონში სტაბილური და ლიდერი ქვეყანა,“ - განაცხადა გიორგი ცუცქირიძემ. 

ეკონომიკის ექსპერტის შეფასებით, „S&P“-ის მიერ საქართველოს სუვერენული რეიტინგის პერსპექტივის გაუმჯობესება სტაბილურიდან პოზიტიურის მიმართულებით, მიმდინარე ეკონომიკური რეფორმების კიდევ ერთ აღიარებას და მხარდაჭერასაც გულისხმობს, მათ შორის ხაზგასმულია ახალი საბანკო რეგულაციების შემოღების და დაგროვებით  საპენსიო სისტემაზე გადასვლის მნიშვნელობა, რომლებიც ხელს შეუწყობს საგარეო შოკებისადმი მდგრადობას და უფრო მაღალ და ინკლუზიურ ეკონომიკურ ზრდას. 

„ეს აღიარება იმ თვალსაზრისითაც არის ნიშანდობლივი, რომ პრაქტიკულად აბათილებს  ოპოზიციის ნარატივს რეფორმების წარუმატებელ ხასიათზე. დღემდე გრძელდება საბანკო რეგულაციების თუ დაგროვებითი საპენსიო სისტემის კრიტიკა, სადაც აქცენტები ცალკეულ დეტალებზე უფრო კეთდება, ვიდრე არსებით მხარეზე, ხშირად თავისებური ინტერპრეტაციებით და რაც თვალშისაცემია ხდება ამ საკითხების წმინდა პოლიტიკურ ჭრილში გადატანა. ამ თემების განხილვისას არც პოლიტიკური ინსიუნაციების გამოყენებაა იშვიათობა, საპარლამენტო და არასაპარლამენტო ოპოზიციის მხრიდან, რასაც ასევე ემატება ექსპერტთა ნაწილის მხრიდან სუბიექტური შეფასებები, რომლის თანახმადაც ჩვენს მიერ ფონდში აკუმულირებული თანხები აპრიორში დანაკარგებისთვის არის განწირული, რაც ამ უმნიშვნელოვანეს რეფორმას ლამის მოსახლეობის მომავალი გაღატაკების უცილობელ პერსპექტივადაც კი  წარმოაჩენს,“ - განაცხადა გიორგი ცუცქირიძემ.

(NS)

ავტორი: ექსპრესნიუსი,

სოციალური ქსელები

უკრაინამ ბოლო ერთი თვის განმავლობაში მესამედ დაბომბა ნავთობის საწყობი, რომელიც კრასნოდარის ოლქსა და ადიღეს საწვავს ამარაგებდა

ტრამპმა გამოაცხადა, რომ აშშ მზადაა ვენესუელაში მიწისძვრის გამო დახმარება გაუწიოს

ვენესუელაში მიწისძვრის ორი სერია მოხდა - 7.2 და 7.5 მაგნიტუდის სიმძლავრის, არიან დაღუპულები

„როსსტატის“ მონაცემებით, ბენზინის ფასების ყოველკვირეული ზრდა ბოლო 20 წლის განმავლობაში ყველაზე დიდია