საქართველოს ეკონომიკისა და მდგრადი განვითარების მინისტრის მოადგილე, რომეო მიქაუტაძე საგურამოში ახალი, 25 მეგავატიანი ქვესადგურის გახსნის ღონისძიებას დაესწრო, რომელიც „ჯორჯიან უოთერ ენდ ფაუერის“ დაკვეთით კომპანია „ენერგოსერვისმა“ ააშენა.

„ძალიან მნიშვნელოვანია ქვეყანაში მაღალტექნოლოგიური ენერგეტიკული ობიექტების მშენებლობა, რადგან ეს უშუალო კავშირშია როგორც დარგის განვითარებასთან, ასევე ინვესტიციების მოზიდვასა და ახალი სამუშაო ადგილების შექმნასთან. „ჯორჯიან უოთერ ენდ ფაუერის“ ახალი ქვესადგური პირდაპირ კავშირში შეიძლება არ იყოს მოსახლეობის ენერგომომარაგებასთან, მაგრამ უმნიშვნელოვანესია, რომ ამით ჩვენ მივიღებთ რამდენიმე სათავე ნაგებობების, ასევე სატუმბე სადგურების ელექტროენერგიით მომარაგების გაუმჯობესებას, რაც, თავის მხრივ, ძალიან მნიშვნელოვანი გარანტი იქნება   თბილისის სტაბილური წყალმომარაგებისთვის“ - განაცხადა რომეო მიქაუტაძემ ღონისძიებაზე სიტყვით გამოსვლისას.

მინისტრის მოადგილის თქმით, საქართველოს მთავრობა აქტიურად მუშაობს იმისთვის, რომ ასეთი ობიექტები ბევრი იყოს ჩვენს ქვეყანაში.

„სასიხარულოა, რომ კომპანიის საქმიანობა არ შემოიფარგლება მხოლოდ ამ ერთი კონკრეტული ობიექტის შექმნით, რამდენიმე წლის წინ ასევე  ვესწრებოდი  „ჯორჯიან უოთერ ენდ ფაუერის“ ჰიდროელექტროსადგურის მშენებლობის გახსნის ღონისძიებას და დარწმუნებული ვარ, რომ კომპანია განვითარებას კიდევ უფრო მეტი წარმატებით გააგრძელებს.  მოგეხსენებათ, რომ ენერგეტიკულ სექტორში საკმაოდ დიდი გამოწვევები გვაქვს, იზრდება მოხმარება, ბევრი ობიექტი შენდება და მინდა იცოდეთ, რომ თითოეული ასეთი პროექტის მხარდამჭერი ყოველთვის იქნება ეკონომიკის სამინისტრო“, - აღნიშნა მიქაუტაძემ.

„ჯორჯიან უოთერ ენდ ფაუერის“ ახალი, 25 მეგავატიანი ქვესადგურის მშენებლობას  5 მლნ ლარზე მეტი ინვესტიცია მოხმარდა, ხოლო  მისი განხორციელების პროცესში 40  ადამიანი დასაქმდა. ქვესადგურს სტრატეგიული მნიშვნელობა აქვს, რადგან ის საგურამოს და ნატახტარის სათავე ნაგებობების, ასევე სატუმბე სადგურების ელექტროენერგიით უწყვეტ მომარაგებას გააუმჯობესებს, რაც თბილისის სტაბილური წყალმომარაგების კიდევ ერთი გარანტი იქნება.

კომპანია ჯორჯიან უოთერ ენდ ფაუერი GGU (Georgian Global Utilities) ჯგუფის წევრია.  თავის მხრივ Georgia Global Utilities „საქართველოს კაპიტალში“ შემავალი კომპანიაა, რომელიც ინვესტირებას წყალმომარაგებისა და ენერგეტიკის მიმართულებით ახორციელებს.

(NS)

ავტორი: ,

სოციალური ქსელები

გულია: აფხაზეთს შეუძლია დღეში ათასი უპილოტო საფრენი აპარატით შეუტიოს საქართველოს და 10 დღეში გაიმარჯვოს

„რუმს ჰოტელსისა“ და „აჭარა ჯგუფის“ დამფუძნებელი თემურ უგულავა გარდაიცვალა

რუსეთი შავ ზღვაში თურქულ გემს თავს დაესხა, რასაც მსხვერპლი მოჰყვა

ერთი მოწვევა, ორი საჩუქარი - ახალი შესაძლებლობა თიბისის მობაილბანკში