პრეზიდენტი: ბიძინა ივანიშვილი, როგორც მართველი პარტიის ლიდერი, უნდა გახდეს პრემიერ-მინისტრი

2018-06-14 11:47:13, 729 ნახვა

კომენტარი

„თუ ჩვენ ვლაპარაკობთ პასუხისგებლიან პოლიტიკაზე, ბიძინა ივანიშვილი, როგორც მართველი პარტიის ლიდერი, უნდა გახდეს პრემიერ-მინისტრი“, - ამის შესახებ საქართველოს პრეზიდენტმა გიორგი მარგველაშვილმა განაცხადა.

როგორც მან აღნიშნა, უნდა დასრულდეს პროცესი, როდესაც საზოგადოებისთვის გაუგებარია, რატომ მიდიან თანამდებობიდან პრემიერ-მინისტრები და რა პრინციპით შეირჩევიან მათი შემცვლელები.

"გუშინ ბატონი პრემიერი წავიდა თანამდებობიდან და მან თქვა, რომ პარტიის თავმჯდომარეს, ანუ ბიძინა ივანიშვილს უნდა მისცეს შესაძლებლობა, რომ დააკომპლექტოს ახალი მთავრობა. მე მიმაჩნია, რომ ეს პროცესები ბევრად უფრო გასაგები, გამჭვირვალე და გააზრებული უნდა იყოს საზოგადოების მიერ. მე მიმაჩნია, რომ საზოგადოებისთვის გასაგები უნდა იყოს რატომ მიდიან უცებ თანამდებობიდან პრემიერ-მინისტრები, რომლებიც არიან წარმატებული, ისევე როგორც წინა პრემიერ მინისტრის ბატონი ღარიბაშვილის წასვლის წინ ჩვენ მოვისმინეთ, რომ წარმატებული პრემიერ-მინისტრია. რატომ მიდიან თანამდებობიდან წარმატებული პრემიერ მინისტრები, რა არის ამის მიზეზი? რა პრინციპებით და კრიტერიუმებით შეირჩევიან ახალი პრემიერ მინისტრები? და მე მიმაჩნია ეს მასკარადი რაღაც პერიოდში უცებ ირჩევიან პრემიერ მინისტრები და რა პრინციპებით ირჩევიან ეს საზოგადოებისთვის, მათ შორის ჩვენი უცხოელი პარტნიორებისთვის გაუგებარია, ეს უნდა დამთავრდეს.

თუ ევროპულ არჩევანზე ვამბობთ, თუ ევროპულ ფორმირებაზე ვამბობთ მარტივად მოგახსენებთ, იქ პრემიერ მინისტრები არიან მართველი პარტიის ლიდერები და შესაბამისად ბიძინა ივანიშვილი, როგორც მართველი პარტიის ლიდერი უნდა გახდეს პრემიერ მინისტრი თუ ჩვენ ვლაპარაკობთ პასუხისგებლიან პოლიტიკაზე და თუ ჩვენ ვლაპარაკობთ ისეთი სახელმწიფოს პროცესის ფორმირებაზე, რომელიც სახელმიფოსთვის, საზოგადოებისთვის გასაგებია. თუ ჩვენ ვლაპარაკობთ ისეთი პრემიერ მინისტრის დანიშვნაზე და ისეთი პრემიერ მინისტრის არჩევაზე რომლის მიმართაც არ გაჩნდება კითხვები რატომ წავიდა თანამდებობიდან და რომლის პასუხისგებელია თავის მიერ მიღებულ გადაწყვეტილებებზე და რომელსაც ძალაუფლების შესაძლებლობა გააჩნია ამ ამ გადაწყვეტილების ცხოვრებაში გატარების. ასე ფორმირდება ევროპული პოლიტიკური კულტურა. შესაბამისად, მე ვფიქრობ, რომ ამ რაღაცნაირი პროცესის დასასრული უნდა იყოს ეს, როდესაც არ ვიცით ჩვენ ვინ რა პრინციპით ხსნის პრემიერ მინისტრებს, რა პრინციპით არჩევს პრემიერ მინისტრებს“, - განაცხადა გიორგი მარგველაშვილმა.

შეგახსენებთ, საქართველოს პრემიერ-მინისტრმა გიორგი კვირიკაშვილმა თანამდებობა დატოვა, რის შედეგადაც, უფლებამოსილება მინისტრთა კაბინეტის ყველა წევრს შეუწყდა. პრეზიდენტმა მთავრობისათვის მოვალეობის დაკისრების შესახებ განკარგულება გუშინვე გამოსცა. პრემიერ-მინისტრობის ახალი კანდიდატი მმართველმა გუნდამ პრეზიდენტს 7 დღის ვადაში უნდა წარუდგინოს.