მღებრიშვილი კახიძეს: ერთ ანეკდოტს მახსენებთ „ნასოსზე“

2016-11-25 17:30:54, 888 ნახვა

პოლიტიკა

საქსტატს კვარტალში ერთხელ მიეწოდება ჩვენგან სტატისტიკა და რა გინდათ ახლა, დავიგინო თუ დავიფიცო, - ასე უპასუხა შს მინისტრობის კანდიდატმა გიორგი მღებრიშვილმა, "ნაციონალური მოძრაობის" დეპუტატ ოთარ კახიძის კითხვას, თუ რატომ არ აქვეყნებს მისი უწყება ყაჩაღობასთან დაკავშირებულ მონაცემებს, მათ შორის არ ახდენს მკვლელობების რეგისტრაციას.

შს მინისტრობის კანდიდატმა კახიძეს, ერთი ყაჩაღობის ფაქტის დასახელებისკენ მოუწოდა, რომელიც მისი თქმით არ დარეგისტრირებულა შინაგან საქმეთა სამინისტროში.

კახიძემ განაცხადა, რომ რასაც არეგისტრირებს შინაგან საქმეთა სამინისტრო, შემდეგ არ აქვეყნებს.
ამასთან, მღებრიშვილის თქმით, „საქსტატს“ 3 თვეში ერთხელ მიეწოდება სტატისტიკა, რომელიც კვარტალში ერთხელ აქვეყნებს მას, რაზეც კახიძემ უპასუხა, რომ შეუძლია ახლავე გახსნას საქსტატის გვერდი და შსს-ს სტატისტიკა იქ არ დევს.

„ეს საჯარო ინფორმაციაა, მოგვმართეთ და მოგცემთ. არაფერი არ იმალება. „საქსტატს“ მიეწოდება, ქართულად გეუბნებით“, - უპასუხა მღებრიშვილმა. ამის შემდეგ ოთარ კახიძე დაინტერესდა რამდენი ბანკი დააყაჩაღეს 2012 წელს და 2016 წელს, რაზეც მღებრიშვილმა უპასუხა, რომ რამდენი ყაჩაღობაც მოხდა, იმდენი აღრიცხეს სტატისტიკაში.

„თქვენ ხართ პირველები შემთხვევის ადგილზე. ჩვენ ყველა ყაჩაღობას აღვრიცხავთ სტატისტიკაში. კიდევ ერთხელ გეუბნებით, ყაჩაღობა არ არის გაზრდილი, შემცირებულია“,- განაცხადა მღებრიშვილმა.
ამას, კახიძის პასუხი მოჰყვა, რომლის თანახმადაც, ყაჩაღობის მაჩვენებელი რა თქმა უნდა შემცირდება, თუ შსს არ დაარეგისტრირებს.

მღებრიშვილმა კახიძეს მიმართა, რომ ერთ ანეკდოტს ახსენებს.

„კიდევ გეუბნებით, წეღანაც გითხარით, ერთ ანეკდოტს მახსნებთ, „ნასოსზე“, -მიმართა მრებრიშვილმა კახიძეს და დასძინა, რომ ის ჩასაფრებულის პოზიციიდან საუბრობს.