„ჩვენ არ მივიღებთ ერთპარტიულ პარლამენტს, რაც სურს „ოცნებას“ და არც ორპარტიულს, რაც უკვე სურთ „ოცნებას“ და „ნაციონალებს“

2016-09-29 21:19:16, 804 ნახვა

პოლიტიკა

მე დარწმუნებული ვარ, რომ ჩვენ ვერ და არ მივიღებთ ორ პარტიას, ერთმანეთთან დარჩენილს, როგორც ეს სურს უკვე ერთად "ოცნებას" და "ნაციონალებს", - ამის შესახებ პარლამენტის თავმჯდომარე დავით უსუფაშვილმა გლდანში, მოსახლეობასთან შეხვედრის შემდეგ ჟურნალისტებს განუცხადა.

"რესპუბლიკური" პარტიის ლიდერი დარწმუნებულია, რომ 8 ოქტომბერს არჩევანი იქნება ქვეყნის სასიკეთო.

"ვხედავთ მოსახლეობის, ერთის მხრივ, უკმაყოფილებას, იმიტომ რომ ელოდნენ ამ ოთხ წელიწადში გაცილებით მეტს, მეორეს მხრივ კი ვხედავთ იმას, რომ მათ იმედი აქვთ უკეთესი მომავლის. ჩივიან იმაზე, რომ არჩევანის გაკეთება ზოგჯერ ჭირს, რადგან ბევრი პოლიტიკოსია, მაგრამ მე მგონია 8 ოქტომბერს არჩევანი იქნება ქვეყნისთვის სასიკეთო. დარწმუნებული ვარ, ჩვენ არ მივიღებთ ერთპარტიულ პარლამენტს, როგორც ეს სურს "ქართულ ოცნებას". მე დარწმუნებული ვარ, რომ ჩვენ ვერ და არ მივიღებთ ორ პარტიას, ერთმანეთთან დარჩენილს, როგორც ეს სურს უკვე ერთად "ოცნებას" და "ნაციონალებს", დარწმუნებული ვარ ჩვენ მივიღებთ მრავალპარტიულ პარლამენტს, რომელშიც გაკეთდება საქმე და რომელიც არ იქნება თავშესაფარი ადამიანების, რომლებმაც სხვა საქმე მოილიეს ან არ აინტერესებთ პოლიტიკა", - განაცხადა დავით უსუფაშვილმა.