უხეშად მიმართავთ მხარეს - არ გაპატიებთ, დაგაჯარიმებთ და გაგაძევებთ სხდომათა დარბაზიდან, - ასე მიმართა მოსამართლე გიორგი არევაძემ წამების მსხვერპლთა ფსიქოლოგიური რეაბილიტაციის ცენტრ "ემპათიას" ხელმძღვანელს, მარიამ ჯიშკარიანს მიხეილ სააკაშვილის სასამართლო პროცესზე, სადაც მისი დაკითხვა მიმდინარეობს.

მოსამართლემ ჯიშკარიანს შენიშვნა მას შემდეგ მისცა, რაც "ემპათიას" ხელმძღვანელმა ბრალდების მხარის წარმომადგენელს არასათანადოდ მიმართა.

"ქ-ნო მარიამ, გაფრთხილებთ, წეღან მგონი კარგად ვერ აგიხსენით და ვერ გაგაგებინეთ, რომ პროცესის ყველა მონაწილის მიმართ უნდა იყოთ კორექტული და პატივისცემით ესაუბრებოდეთ. დაახლოებით, 40 წუთი თქვენს რეგალიებზე გვესაუბრეთ და უხეშად მიმართავთ მხარეს. ამას არ გაპატიებთ, დაგაჯარიმებთ, გამიგეთ? დაგაჯარიმებთ და თუ იქამდე მივიდა ეს საქმე, რომ კიდევ გაგრძელდა, გაგაძევებთ სხდომათა დარბაზიდან. არ მინდოდა ამის თქმა, მაგრამ როგორც ჩანს, ასე პირდაპირ მომიწევს მითითება, გასაგებია? ასე რომ "კიდევ მიიღებს" და ვინ რას "მიიღებს" - ამ ტერმინებით ნუ საუბრობთ", - მიმართა გიორგი არევაძემ მარიამ ჯიშკარიანს.

შეგახსენებთ, თბილისის საქალაქო სასამართლო საქართველოს მესამე პრეზიდენტის სასჯელის გადავადების ან სასჯელისგან გათავისუფლების შუამდგომლობაზე მსჯელობს. პროცესზე დღეს ნობელის პრემიის ლაურეატი ექიმი ჯეიმს კობი დაიკითხა. 

ექსპრეზიდენტის გათავისუფლების ან სასჯელის გადავადების მოთხოვნით, მისმა ადვოკატმა, შალვა ხაჭაპურიძემ სასამართლოს შუამდგომლობით 1-ელ დეკემბერს მიმართა.

მესამე პრეზიდენტის უფლებადამცველის შუამდგომლობას უძღოდა წამების მსხვერპლთა ფსიქოლოგიური რეაბილიტაციის ცენტრ "ემპათიას" დასკვნა, რომლის მიხედვითაც მიხეილ სააკაშვილს 20-ზე მეტი დიაგნოზი თუ სიმპტომო-კომპლექსი აღენიშნება, აქედან წამყვანია, დაახლოებით, 10 დიაგნოზი, რაც შეუთავსებელს ხდის პატიმრობას.

ავტორი: ექსპრესნიუსი,

სოციალური ქსელები

დიდი შვიდეულის სამიტზე უკრაინის პრეზიდენტი ტრამპსა და რუბიოს შეხვდა

შსს-ს ახალი სამმართველოს საჩივრის საფუძველზე, ნიკა გვარამიას შეურაცხყოფის ფაქტზე, მოქალაქეს 2000-ლარიანი ჯარიმა დაეკისრა

პაპუაშვილი: ახია საფრანგეთზე! როდესაც სხვა ქვეყნების შიდა საქმეებში ერევი, მზად უნდა იყო იმისთვის, რომ შენც ასევე მოგეპყრობიან

მსოფლიო რაგბის მომავალი საქართველოში იკრიბება - 27 ივნისიდან ახალგაზრდული მსოფლიო ჩემპიონატი იწყება